(កណ្តាល)៖ លោក យី យ៉េន អភិបាលស្រុកមុខកំពូល និងជាប្រធានគណៈបញ្ជាការឯកភាពរដ្ឋបាលស្រុកមុខកំពូល នាថ្ងៃទី០៣ ខែមេសា ឆ្នាំ២០២៥ រដ្ឋបាលស្រុកមុខកំពូល បានដឹកនាំកិច្ចប្រជុំបូកសរុបលទ្ធផលការងារប្រចាំខែមីនា និងលើកទិសដៅការងារអនវត្តបន្តសម្រាប់ខែមេសា ឆ្នាំ២០២៥ និងកិច្ចប្រជុំគណៈបញ្ជាការឯកភាពរដ្ឋបាលស្រុកមុខកំពូល របស់រដ្ឋបាលស្រុកមុខកំពូល ដោយមានការចូលរួមពីលោក លោកស្រី អ្នកពាក់ព័ន្ធក្នុងមូលដ្ឋានគ្រប់ផ្នែក។
នៅក្នុងកិច្ចប្រជុំនេះលោក យី យ៉េន បានដាក់បទបញ្ជាយ៉ាងម៉ឺងម៉ាត់ដល់អាជ្ញាធរពាក់ព័ន្ធ ត្រូវអនុវត្តគោលការណ៍របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ពាក់ព័ន្ធនឹងបញ្ហាក្មេងទំនើង បញ្ហាគ្រឿងញៀន និងល្បែងស៊ីសងដែលកើតមាននៅក្នុងភូមិសាស្ត្ររបស់ខ្លួន និងបានណែនាំដល់មន្ត្រីទាំងអស់មិនថាអាជ្ញាធរមូលដ្ឋាន ឬកងកម្លាំងឡើយ ត្រូវដកខ្លួនឱ្យផុតពីបញ្ហានេះបើមានមន្ត្រីណាពាក់ព័ន្ធនឹងល្បែង ត្រូវចាត់វិធានការតាមច្បាប់ដោយមិនមានការយោគល់ឡើយ។
បន្ថែមពីនេះលោកប្រធានគណៈបញ្ជាការឯកភាពស្រុក បានស្នើដល់មន្ត្រីអត្តសញ្ញាណកម្មត្រូវពង្រឹងការធ្វើអត្តសញ្ញាណប័ណ្ណសញ្ញាតិខ្មែរ(ទាំងថ្មី ទាំងចាស់) ដើម្បីពន្លឿនក្នុងការធ្វើបច្ចុប្បន្នភាពដែលមានអត្តសញ្ញាប័ណ្ណក្នុងមូលដ្ឋានរបស់ខ្លួន។
ឆ្លៀតក្នុងឱកាសនេះដែរ លោកប្រធានគណៈបញ្ជាការឯកភាពស្រុក បានអនុញ្ញាតឱ្យលោកប្រធានការិយាល័យផែនការស្រុក ធ្វើការផ្សព្វផ្សាយសេចក្តីជូនដំណឹងលេខ ០៧៦សជណ/របប ស្តីពីការផ្សព្វផ្សាយបញ្ជីឈ្មោះអ្នកទទួលការដែលត្រូវបានដាក់ក្នុងបញ្ជីខ្មៅ ឬត្រូវបានហាមឃាត់មិនឱ្យដាក់សំណើដេញថ្លៃកិច្ចសន្យាឃុំ សង្កាត់៕
