(ភ្នំពេញ)៖ លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានទទួលបុព្វសិទ្ធិពីអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាភាគីហត្ថលេខីតំណាងរាជរដ្ឋាភិបាលកម្ពុជា ជាមួយលោក SANUI Kazumasa ប្រធានទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំនៅកម្ពុជា នាព្រឹកថ្ងៃទី៣១ ខែមីនា ឆ្នាំ២០២៥ បានចុះហត្ថលេខាលើកិច្ចព្រមព្រៀងហិរញ្ញប្បទាន សហប្រតិបត្តិការចំនួន៤ ក្នុងនោះ កិច្ចព្រមព្រៀងហិរញ្ញប្បទានឥតសំណងថ្មីចំនួន១ និងវិសោធនកម្មនៃកិច្ចព្រមព្រៀង ហិរញ្ញប្បទានឥតសំណងចំនួន៣ ដែលមានទឹកប្រាក់សរុបចំនួន ៣ ៩១៦លានយ៉េនជប៉ុន ត្រូវជាប្រមាណ ២៦លានដុល្លារ។

កិច្ចព្រមព្រៀងហិរញ្ញប្បទានសហប្រតិបត្តិការចំនួន ៤ រួមមានដូចខាងក្រោម៖

ទី១៖ កិច្ចព្រមព្រៀងហិរញ្ញប្បទានឥតសំណងសម្រាប់កម្មវិធីអភិវឌ្ឍន៍សង្គមនិងសេដ្ឋកិច្ច (The Economic and Social Development Programme) មានទឹកប្រាក់ចំនួន ១ ១៦៦លានយ៉េនជប៉ុន ត្រូវជាប្រមាណ ៧.៧៧លានដុល្លារអាម៉េរិក។

កម្មវិធីនេះមានគោលបំណងគាំទ្រ ដល់ការធ្វើឱ្យប្រសើរឡើងនូវសមត្ថភាពរបស់មជ្ឈមណ្ឌលសកម្មភាពកំចាត់មីនកម្ពុជា (CMAC) និងប្រសិទ្ធភាពនៃការបណ្តុះបណ្តាល ស្តីអំពីសកម្មភាពបោសសម្អាតមីន តាមរយៈការផ្តល់សម្ភារសំខាន់ៗចាំបាច់ទាក់ទងនឹងសកម្មភាពសម្អាតមីន នៅតាមអង្គភាព CMAC ក្នុងខេត្តកំពង់ឆ្នាំង, ខេត្តបាត់ដំបង និងទីតាំងបណ្តុះបណ្តាលនានា។

ទី២៖ វិសោធនកម្មនៃកិច្ចព្រមព្រៀងហិរញ្ញប្បទានឥតសំណងសម្រាប់គម្រោងសាងសង់អគារហ្វឹកហ្វឺន និងអគារផ្សព្វផ្សាយអប់រំការយល់ដឹងពីសង្គ្រាមនៃមជ្ឈមណ្ឌលសកម្មភាពកំចាត់មីនកម្ពុជា មានថវិកាបន្ថែមចំនួន ៣០០លានយ៉េនជប៉ុន ត្រូវជាប្រមាណ ២លានដុល្លារអាម៉េរិក (កិច្ចព្រមព្រៀងដើម មានទឹកប្រាក់ ចំនួន ២,៤៥១លានយ៉េនជប៉ុន ត្រូវជាប្រមាណ ១៦.៣៤លានដុល្លារអាម៉េរិក)។

គម្រោងនេះ មាន គោលបំណងបំពេញតម្រូវការចាំបាច់ និងសម្រេចទស្សនវិស័យនៃវិទ្យាស្ថានបច្ចេកទេសសកម្មភាពមីន របស់អង្គភាព CMAC, ធ្វើឱ្យប្រសើរឡើងនូវការយល់ដឹងជាសាធារណៈអំពីផលប៉ះពាល់ដោយសារគ្រាប់ មីន និងសំណល់ យុទ្ធភណ្ឌសង្គ្រាម, ផ្សព្វផ្សាយអប់រំអំពីវិបត្តិនៃសង្គ្រាម និងលើកកម្ពស់ស្មារតីឱ្យស្គាល់ពី តម្លៃពិតនៃសន្តិភាព ក្នុងស្ថានភាពចំពោះមុខ និងអនាគត តាមរយៈការសាងសង់សំណង់អគារមួយចំនួន ដើម្បីធ្វើឱ្យប្រសើរឡើង នូវមុខងារដែលមានស្រាប់របស់វិទ្យាស្ថានបច្ចេកទេសសកម្មភាពមីន ក្នុងខេត្ត កំពង់ឆ្នាំង, សាងសង់អគារផ្សព្វផ្សាយអប់រំការយល់ដឹងអំពីសង្គ្រាម នៅខេត្តសៀមរាប និងហេដ្ឋា រចនាសម្ព័ន្ធចាំបាច់មួយចំនួនទៀត។

ទី៣៖ វិសោធនកម្មនៃកិច្ចព្រមព្រៀងហិរញ្ញប្បទានឥតសំណងសម្រាប់គម្រោងពង្រីកសមត្ថភាពប្រព័ន្ធផ្គត់ផ្គង់ ទឹកស្អាតភូមិព្រែក នៅរាជធានីភ្នំពេញ មានថវិកាបន្ថែមចំនួន ១,៨៥០លានយ៉េនជប៉ុន ត្រូវជាប្រមាណ ១២,៣៣លានដុល្លារអាម៉េរិក (កិច្ចព្រមព្រៀងដើមមានទឹកប្រាក់ចំនួន ៣ ៣៦១លានយ៉េនជប៉ុន ត្រូវ ជាប្រមាណ ២២.៤១លានដុល្លារអាម៉េរិក)។ គម្រោងនេះមានគោលបំណងពង្រីកសមត្ថភាពផលិតរបស់រោងចក្រប្រព្រឹត្តកម្មទឹកស្អាតភូមិព្រែក ពី ១៥០,០០០ម៉ែត្រគូបក្នុងថ្ងៃ រហូតដល់ ១៩៥ ០០០ម៉ែត្រគូប តាមរ យៈការសាងសង់រោងចក្រប្រព្រឹត្តិកម្មទឹកស្អាតដែលមានសមត្ថភាពផ្គត់ផ្គង់ទឹកស្អាត ៤៥,០០០ម៉ែត្រគូបក្នុងថ្ងៃ សាងសង់ប្រព័ន្ធបណ្តាញស្ថានីយបូមទឹកឆៅ, អាងស្តុកទឹក, និងប្រព័ន្ធចែកចាយទឹក។

គិតចាប់ពីឆ្នាំ ១៩៩៣ មកដល់បច្ចុប្បន្ននេះ ហិរញ្ញប្បទានសហប្រតិបត្តិការក្នុងវិស័យទឹកស្អាតដែលគាំទ្រដោយ JICA បានរួមចំណែកដល់ការសម្រេចឱ្យបាននូវគោលដៅទី ៦.១ នៃគោលដៅអភិវឌ្ឍប្រកបដោយចីរភាពនៅ ឆ្នាំ២០៣០ ជាពិសេស គឺគោលនយោបាយទឹកស្អាតរបស់រាជរដ្ឋាភិបាលនីតិកាលទី៧ នៃរដ្ឋសភា។ គម្រោងនេះ បានគិតបញ្ចូលក្នុងផែនការពង្រីកសមត្ថភាពផលិតទឹកស្អាត និងមានចែងក្នុងផែនការមេ ដំណាក់កាលទី៣ ឆ្នាំ២០២១-២០៣០ ដែលសំដៅសម្រេចឱ្យបាននូវគោលនយោបាយទឹកស្អាត របស់រាជរដ្ឋាភិបាលកម្ពុជា ដែលកំណត់ថា«ចាប់ពីឆ្នាំ២០២៥ នេះតទៅ ប្រជាពលរដ្ឋរស់នៅតាមទីក្រុង ទីប្រជុំជន នៅទូទាំងប្រទេសចំនួន ១០០% ត្រូវទទួលបានសេវាកម្មទឹកស្អាតតាមបំពង់សម្រាប់ប្រើប្រាស់ និងពីប្រភេទផ្សេងៗ»។

និងទី៤៖ វិសោធនកម្មនៃកិច្ចព្រមព្រៀងហិរញ្ញប្បទានឥតសំណងសម្រាប់គម្រោងការកសាងបណ្តាញស្ថានីយវាស់វែង អចិន្ត្រៃយ៍ដោយផ្កាយរណបទូទាំងប្រទេស មានថវិកាបន្ថែមចំនួន ៦០០លានយ៉េនជប៉ុន ត្រូវជាប្រមាណ ៤លានដុល្លារអាម៉េរិក (កិច្ចព្រមព្រៀងដើម មានទឹកប្រាក់ចំនួន ១ ៣៣៨លានយ៉េនជប៉ុន ត្រូវជាប្រមាណ ៨.៩២លានដុល្លារអាម៉េរិក)។ គម្រោងនេះមានគោលបំណងពង្រឹងសេវារដ្ឋបាលសម្រាប់ការចុះបញ្ជីដីធ្លីទូទាំងប្រទេសកម្ពុជា តាមរយៈការបង្កើតបណ្តាញស្ថានីយវាស់វែងអចិន្ត្រៃយ៍ដោយប្រព័ន្ធផ្កាយរណប ដែលអាចទទួលទិន្នន័យកំណត់ទីតាំងដែលមានសុក្រិតភាពខ្ពស់ពីប្រព័ន្ធផ្កាយរណប សកល, និងការដំឡើងឧបករណ៍សម្រាប់មជ្ឈមណ្ឌលគ្រប់គ្រងទិន្នន័យរួមមួយដែលនឹងត្រូវធ្វើប្រតិបត្តិការជាប្រព័ន្ធ។

ឆ្លៀតក្នុងឱកាសនេះ, លោក រស់ សីលវ៉ា ក្នុងនាមរាជរដ្ឋាភិបាលកម្ពុជា, អគ្គបណ្ឌិតសភាចារ្យ អូន ព័ន្ធមុនីរ័ត្ន និងប្រជាជនកម្ពុជា បានថ្លែងអំណរគុណដល់រដ្ឋាភិបាលជប៉ុន និងប្រជាជនជប៉ុន និងគ្រប់ស្ថាប័នពាក់ព័ន្ធរបស់រដ្ឋាភិបាលជប៉ុន ជាពិសេសទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដែលតែងតែបានផ្តល់នូវកិច្ចសហប្រតិបត្តិការដ៏ល្អប្រសើរ និងបានចូលរួមគាំទ្រដល់ការអភិវឌ្ឍសង្គម-សេដ្ឋកិច្ចនៅកម្ពុជា តាមរយៈការបន្តផ្តល់ហិរញ្ញប្បទានសម្រាប់ការអភិវឌ្ឍផ្លូវការ (ODA) ទាំងក្នុងក្របខ័ណ្ឌហិរញ្ញប្បទានឥតសំណង, ឥណទានសម្បទាន និងជំនួយបច្ចេកទេសដែលបានឆ្លើយតបចំទិសដៅស្របតាមយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា៕