(កណ្ដាល)៖ លោក ជា សំណាង និងលោកស្រី អោ ស៊ីណា ជាបេក្ខជនក្រុមប្រឹក្សាខេត្តកណ្តាល និងជាសមាជិកក្រុមការងាររបស់គណបក្សកម្លាំងជាតិនៅខេត្តកណ្តាល បានប្រកាសផ្តាច់ខ្លួនពីគណបក្សប្រឆាំង និងគោរពស្នើសុំគណបក្សប្រជាជនកម្ពុជាខេត្តកណ្តាល ដើម្បីសុំចូលរួមរស់ជីវភាពនយោបាយជាមួយគណបក្សប្រជាជនកម្ពុជា។
នៅថ្ងៃទី២ ខែមេសា ឆ្នាំ២០២៥ លោក គួច ចំរើន ប្រធានគណបក្សប្រជាជនកម្ពុជាខេត្តកណ្តាល បានចេញសេចក្តីសម្រេចប្រកាសបញ្ចូលលោកទាំង២រូប ជាសមាជិកគណបក្សប្រជាជនកម្ពុជារួចរាល់ហើយ។
លោក គួច ចំរើន បានអបអរសាទរ និងកោតសរសើរអ្នកទាំង២ ដែលបានស្វែងយល់ត្រឹមត្រូវ និងសម្រេចចិត្តត្រូវដែលមករួមរស់ជាមួយគណបក្សប្រជាជនកម្ពុជា ព្រោះមានតែគណបក្សទេ ដែលជាសសរទ្រូងប្រទេសជាតិ នាំមកសុខសន្តិភាពដែលដឹកនាំដោយសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានខិតចំតស៊ូជាមួយសហការីទាំងអស់ រំដោះប្រទេសពីរបបអាវខ្មៅ ខណៈដែលដៃម្ខាងខំប្រឹងកសាងប្រទេស និងដៃម្ខាងទៀត ខំប្រឹងទប់ស្កាត់របបអាវខ្មៅមកឱ្យត្រឡប់មកវិញ ដែលជាលទ្ធផលសម្រេចបាននូវស្នាដៃកសាងអភិវឌ្ឍន៍ប្រទេសជាតិឱ្យមានការរីចម្រើនលូតលាស់ទៅមុខជាលំដាប់៕
