(ភ្នំពេញ)៖ ក្នុងឱកាសអញ្ជើញជាអធិបតីបិទសិក្ខាសាលាផ្សព្វផ្សាយស្តីពី «ការការពារ និងទប់ស្កាត់ការផ្សព្វផ្សាយព័ត៌មានមិនពិត Cyber Security» លើវិស័យបរិស្ថាន, លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានគូសបញ្ជាក់ថា «យើងត្រូវប្រើព័ត៌មានពិត បន្សាបព័ត៌មានក្លែងក្លាយ» ខណៈប្រធានបទចាំបាច់ដែលត្រូវលើកយកមកពិភាក្សា និងស្វែងរកវិធីទប់ស្កាត់ ប្រយុទ្ធប្រឆាំងជាប្រចាំ ព្រោះព័ត៌មានក្លែងក្លាយបានបង្កចលាចលសង្គម និងជីវភាពរស់នៅរបស់ប្រជាពលរដ្ឋផងដែរ។

ពិធីនេះមានការចូលរួមពីលោក ឡេង ជីវិន អគ្គនាយកចំណេះដឹង និងព័ត៌មានបរិស្ថាន វាគ្មិនកិត្តិយសលោក អ៊ូ ផាន់ណារិទ្ធ និងលោក ជា លីនណា មកពីក្រសួងប្រៃសណីយ៍ និងទូរគមនាគមន៍ ព្រមទាំងមន្ត្រីរាជការដែលជាជំនួយការថ្នាក់ដឹកនាំក្រសួង មន្ទីរបរិស្ថានទាំង២៥រាជធានី ខេត្តជាច្រើនរូបទៀត នាព្រឹកថ្ងៃទី៣ ខែមេសា ឆ្នាំ២០២៥។

ថ្លែងក្នុងអង្គសិក្ខាសាលា លោក ខ្វៃ អាទិត្យា បានគូសបញ្ជាក់ឱ្យដឹងថា រាជរដ្ឋាភិបាលកម្ពុជាបានផ្តល់ការយកចិត្តទុកដាក់ខ្លាំងលើបច្ចេកវិទ្យា និងបានចាត់ទុកបច្ចេកវិទ្យា ជាកាតាលីករដ៏មានសារៈសំខាន់ថ្មីមួយ ក្នុងការជំរុញកំណើនផលិតភាពសេដ្ឋកិច្ច និងសង្គម។ រាជរដ្ឋាភិបាលកម្ពុជា ក្នុងនោះមានក្រសួងបរិស្ថាន បាននិងកំពុងចូលរួមជាមួយរាជរដ្ឋាភិបាលក្នុងការជំរុញបរិវត្តកម្មឌីជីថល ដោយបញ្ហាព័ត៌មានក្លែងក្លាយ គឺជាប្រធានបទចាំបាច់ដែលត្រូវលើកយកមកពិភាក្សា និងស្វែងរកវិធីទប់ស្កាត់ ប្រយុទ្ធប្រឆាំងជាប្រចាំ ព្រោះព័ត៌មានក្លែងក្លាយបានបង្កចលាចលសង្គម និងជីវភាពរស់នៅរបស់ប្រជាពលរដ្ឋផងដែរ។

លោកបានអំពាវនាវដល់ពលរដ្ឋទាំងអស់ ត្រូវផ្ទៀងផ្ទាត់ព័ត៌មានឱ្យច្បាស់លាស់ មុននឹងជឿលើព័ត៌មានអ្វីមួយ។ ជាមួយគ្នានេះ ទាក់ទងទៅនឹងព័ត៌មានគុណភាពខ្យល់ លោកសូមឱ្យសាធារណជនផ្ទៀងផ្ទាត់ ជឿជាក់លើ App ត្រួតពិនិត្យគុណភាពខ្យល់របស់ក្រសួងបរិស្ថាន។ ក្រសួងបរិស្ថាន បានផ្សព្វផ្សាយផ្តល់ព័ត៌មានពិតជាប្រចាំ ដែលផ្ទុយពីការលើកឡើងពីប្រព័ន្ធផ្សព្វផ្សាយមួយចំនួនដែលមាននិន្នាការបន្លំបំភ្លៃព័ត៌មានទាក់ទងនឹងគុណភាពខ្យល់ ហើយមានព័ត៌មានខ្លះក៏លើកឡើងអំពីការបំពុលខ្យល់នៅក្នុងប្រទេសជិតខាងថាបណ្តាលមកពីប្រទេសកម្ពុជា។

ត្រង់ចំណុចនេះ លោក ខ្វៃ អាទិត្យា បានអះអាងជាថ្មីម្តងទៀត ប្រទេសកម្ពុជា ជាប្រទេសដែលមានការគ្រប់គ្រងគុណភាពខ្យល់បានល្អប្រសើរ ដោយបានដាក់ចេញនូវផែនការ «ផ្ទៃមេឃពណ៌ខៀវ» ដោយមានឧបករណ៍ត្រួតពិនិត្យគុណភាពខ្យល់នៅទូទាំងប្រទេស ដូច្នេះព័ត៌មានស្តីពីគុណភាពខ្យល់ ត្រូវបានផ្សព្វផ្សាយជារឿងរាល់ម៉ោង នៅលើប្រព័ន្ធផ្សព្វផ្សាយក្រសួង ហើយនឹងបណ្តាញសារព័ត៌មានក្នុងស្រុកមួយចំនួន។ ដូចគ្នានេះដែរ សូមឱ្យសាធារណជនផ្ទៀងផ្ទាត់ តាមដានគុណភាពខ្យល់នៅកម្ពុជា តាមរយៈចូលទៅកាន់វេបសាយរបស់ក្រសួងបរិស្ថាន៖www.airquality.moe.gov.kh និងប្រព័ន្ធ APP ឈ្មោះ CGS SPA ដែលធ្វើបច្ចុប្បន្នភាពប្រចាំ។

គួររម្លឹកឱ្យដឹងថា សិក្ខាសាលាដែលរៀបចំដោយនាយកដ្ឋានព័ត៌មាននិងផ្សព្វផ្សាយបរិស្ថាន នៃអគ្គនាយកដ្ឋានចំណេះដឹងនិងព័ត៌មានបរិស្ថាន ធ្វើឡើងក្នុងគោលបំណងដើម្បីពង្រឹងសមត្ថភាពមន្រ្តីរាជការតាមបណ្តាអគ្គនាយកដ្ឋានចំណុះក្រសួងបរិស្ថាន និងមន្រ្តីទទួលបន្ទុកបណ្តាញផ្សព្វផ្សាយព័ត៌មានបរិស្ថានបណ្តាមន្ទីរបរិស្ថាន រាជធានី ខេត្តទាំង២៥ ដើម្បីជៀសផុតពីការហេគ (Hack) ពីជនខិលខូច, បានជ្រួតជ្រាបពីបច្ចុប្បន្នភាពនៃដំណើរការរដ្ឋបាលអេឡិកត្រូនិករបស់រាជរដ្ឋាភិបាលកម្ពុជា ក៏ដូចជាការចូលរួមចែករំលែកនូវបទពិសោធន៍ការងារទាក់ទងនឹងការផ្តល់ព័ត៌មាន ការថែររក្សាសុវត្ថិភាពបណ្តាញផ្សព្វផ្សាយសង្គម ប្រព័ន្ធអ៊ីនធើណេត និងប្រព័ន្ធការពាររបស់ស្ថាប័នជូនអង្គភាពចំណុះក្រសួងបរិស្ថាន ដើម្បីធានាបាននូវសុវត្ថិភាពឯកសារព័ត៌មានពិតពីវិស័យបរិស្ថាន៕