(កំពង់ស្ពឺ)៖ លោក ជាម ចន្ទ័សោភ័ណ អភិបាលខេត្តកំពង់ស្ពឺ បានជំរុញលើកទឹកចិត្តដល់គ្រប់មន្ទីរអង្គភាព និងផ្នែកពាក់ព័ន្ធទាំងអស់ ត្រូវបង្កើនការអប់រំផ្សព្វផ្សាយច្បាប់ចរាចរណ៍ផ្លូវគោកឱ្យកាន់តែទំលំទូលាយដើម្បីកាត់បន្ថយអត្រា គ្រោះថ្នាក់ក្នុងឱកាសសង្ក្រាន្តឆ្នាំថ្មី ដែលនិងចូលមកដល់នាពេលខាងមុខ។ ការលើកទឹកចិត្តឲ្យមានការផ្សព្វផ្សាយនេះ ធ្វើឡើងក្នុងពិធីជួបសំណេះសំណាលជាមួយមន្ត្រីរាជការសាលាស្រុកសាមគ្គីមុនីជ័យ ថ្ងៃទី៣ ខែមេសា ឆ្នាំ២០២៥។
លោកបណ្ឌិត ជាម ចន្ទ័សោភ័ណ បានលើកឡើងថា ការអប់រំផ្សព្វផ្សាយនូវច្បាប់ចរាចរណ៍ផ្លូវគោក គឺជាការបញ្ជ្រាបដល់ពលរដ្ឋគ្រប់រូបគ្រោះថ្នាក់ចរាចរណ៍ជាយថាហេតុដែលបង្កឡើងដោយមនុស្ស ធ្វើឱ្យគ្រប់គ្នាបានដឹងជាប្រចាំអំពី គ្រោះថ្នាក់ នេះហើយជាការចូលរួមចំណែកយ៉ាងសំខាន់ ដើម្បីកាត់បន្ថយអត្រាគ្រោះថ្នាក់ចរាចរណ៍ឱ្យមកនៅកម្រិតទាបបំផុត ពិសេសគឺអត្រាស្លាប់ដោយគ្រោះថ្នាក់ចរាចរណ៍។
លោកបណ្ឌិត បានបញ្ជាក់ឱ្យដឹងថា នៅមួយរយៈចុងក្រោយនេះខេត្តកំពង់ស្ពឺ កើតមានករណីគ្រោះថ្នាក់ចរាចរណ៍កើតឡើងច្រើន ហើយក្នុងនោះបានបណ្តាលឱ្យមានអ្នកស្លាប់យ៉ាងរន្ធត់ដែលផ្តើមឡើងពីការបើកខ្វះការប្រុងប្រយត្ន័ និងបំពានគំនូសចរាចរណ៍ ដូចជាករណីមួយដែលមានយុវជន៣នាក់ជិះម៉ូតូមួយគ្រឿងទៅចូលក្រោមរថយន្តដែលបើកបរផ្ទុយគ្នាធ្វើឱ្យអ្នកបើកបររថយន្តត្រូវរងការចាប់ខ្លួនដាក់ពន្ធនាគារផងដែរទម្រាំដឹងការពិត។
លោកបណ្ឌិត លើកឡើងថា ខេត្តកំពង់ស្ពឺ បាននិងកំពុងមានការអភិវឌ្ឍន៍ខ្លាំងលើវិស័យរោងចក្រ សហគ្រាស ដែលបង្កើតឱកាសការងារយ៉ាងច្រើនដល់ប្រជាពលរដ្ឋនៅក្នុងខេត្តនេះ។ ដោយកំណើនការងារបានធ្វើឱ្យ ពលរដ្ឋមានជីវភាពល្អប្រសើរ ដូច្នេះកំណើនមធ្យោបាយក៏មានការកើនឡើងច្រើនលើសលុប ធ្វើឱ្យការចរាចរណ៍មានភាពមមាញឹកដែលតោងឱ្យមានការប្រុងប្រយត្ន័ខ្ពស់។
ដូច្នេះការអប់រំ និងផ្សព្វផ្សាយច្បាប់ចរាចរណ៍ផ្លូវគោក ទៅដល់អ្នកបើកបរយានយន្ដដឹកកម្មករ និងបងប្អូនកម្មករនិយោជិត គឺជាការងារមួយដ៏ចាំបាច់ដែលយើងត្រូវតែបន្តធ្វើជាប្រចាំ ដើម្បីរួមចំណែករក្សានូវសុវត្ថិភាព ក្នុងពេលធ្វើដំណើររបស់បងប្អូនកម្មករនិយោជិត ពិសេសកំឡុងពេលអបអរសាទរកំពង់ស្ពឺសង្ក្រាន្តដែលរដ្ឋបាលខេត្តរៀបចំដើម្បីបង្កើនភាពសប្បាយរីករាយជូនបងប្អូនប្រជាពលរដ្ឋ ភ្ញៀវជាតិ ភ្ញៀវអន្តរជាតិ ៕
