(ក្រចេះ)៖ នៅព្រឹកថ្ងៃព្រហស្បតិ៍ ទី៣ ខែមេសា ឆ្នាំ២០២៥នេះ វិទ្យាល័យ ហ៊ុន សែន សម្ភៈបុរៈ ស្ថិតនៅទីរួមស្រុកសំបូរ ខេត្តក្រចេះ បានរៀបចំពិធីអបអរសង្ក្រាន្តឆ្នាំថ្មី។
ពិធីអបអរសង្ក្រាន្តឆ្នាំថ្មីរបស់វិទ្យាល័យ ហ៊ុន សែន សម្ភៈបុរៈ ត្រូវបានផ្តួចផ្តើមរៀបចំដោយព្រះអង្គគ្រូ ព្រះសិរីសម្ភារ៍ បណ្ឌិត អេង ផល្លា ព្រះរាជាគណៈកិត្តិយសនៃព្រះរាជាណាចក្រកម្ពុជា ព្រះអនុគណស្រុកសំបូរ ខេត្តក្រចេះ និងព្រះចៅអធិការវត្តព្រះវិហារធំសសរ១០០ និងជាព្រះប្រធានគណៈកម្មការគ្រប់គ្រងវិទ្យាល័យ ហ៊ុន សែន សម្ភៈបុរៈ ព្រមទាំងគណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សនៅក្នុងសាលាទាំងមូល។
វិទ្យាល័យ ហ៊ុន សែន សម្ភៈបុរៈ បានជាប់ជាវិទ្យាល័យស្តង់ដាសាលាគំរូក្នុងឆ្នាំសិក្សាឆ្នាំ២០២៣-២០២៤។ ក្រៅពីផ្តោតការយកចិត្តទុកដាក់ពង្រឹងការអប់រំស្របតាមកម្មវិធីក្រសួងអប់រំ យុវជន និងកីឡាបានដាក់ចេញហើយនោះ សាលាក៏បានផ្តោតសំខាន់លើសកម្មភាពនានាជាច្រេីន រួមបញ្ចូលទាំងកម្មវិធីអប់រំចរិយាធម៌ សីលធម៌ សុជីវធម៌ (ស្អាត សុភាព របៀប ទាន់ពេល) ជាដេីម។
កម្មវិធីអបអរសាទរសង្ក្រាន្តឆ្នាំដែលរៀបចំឡើងនាព្រឹកថ្ងៃនេះ ក្រៅពីការជួបជុំ លេងល្បែងប្រជាប្រិយខ្មែរជាការកម្សាន្តហើយនោះ សាលាក៏បានរៀបចំតាំងពិព័រណ៍ស្នាដៃសិស្សផងដែរ។ ការរៀបចំនេះមានគោលបំណងបំផុសស្នាដៃសិស្សានុសិស្ស ផ្សារភ្ជាប់ការសិក្សាទៅនឹងការប្រតិបត្តិផ្ទាល់ នៃបន្ទប់ពិសោធន៍ និងការបង្កេីតស្នាដៃតាមក្រុមនីមួយៗ ដែលបានបង្ហាញពីគំនិតច្នៃប្រឌិត និងសម្រេចបង្កេីតផលិតផល ស្មារតីសហការជាក្រុម ការបង្កេីតគំនិតនវានុវត្តន៍ និងសហគ្រិនភាពជាដេីម។
ក្នុងពិធីនេះ ក៏បានចូលរួមចំណែកយ៉ាងសំខាន់ក្នុងការចូលរួមអភិរក្សមរតកប្រពៃណីវប្បធម៌ ចម្រៀង របាំប្រពៃណីជាតិ ដែលបុព្វបុរសខ្មែរបានបន្សល់ទុក និងផ្តល់ជូនឱ្យយុវជនដែលជាសសរទ្រូងនៃប្រទេសជាតិ បានដឹង បានយល់ បានចូលរួមលេងកម្សាន្តក្នុងកម្មវិធីបុណ្យជាតិតូច ធំនានា ជាពិសេសបុណ្យចូលឆ្នាំថ្មីប្រពៃណីជាតិខ្មែរ មហាសង្ក្រាន្តឆ្នាំថ្មីដែលនឹងឈានចូលមកដល់ក្នុងពេលឆាប់ៗ ខាងមុខនេះ៕
