(ភ្នំពេញ)៖ ក្នុងជំនួបពិភាក្សាការងាររវាងលោក នេត្រ ភក្ត្រា រដ្ឋមន្រ្តីក្រសួងព័ត៌មាន និងលោក Nguyen Hoang Trung អគ្គនាយករងទទួលបន្ទុកផ្នែកពាណិជ្ជកម្មរបស់ក្រុមហ៊ុនមិត្តហ្វូន( Metfone )នៅព្រឹកថ្ងៃទី៣ ខែមេសា ឆ្នាំ២០២៥ នាទីស្តីការក្រសួង បានផ្តោតជាសំខាន់ក្នុងការបន្តពង្រឹងកិច្ចសហការគ្នាលើការផ្សព្វផ្សាយឱ្យបានកាន់តែទូលំទូលាយដល់ប្រជាពលរដ្ឋតាមរយៈប្រព័ន្ធផ្សព្វផ្សាយទំនើប ពិសេសរួមគ្នាប្រយុទ្ធប្រឆាំងព័ត៌មានក្លែងក្លាយ ដោយក្នុងនោះក្រុមហ៊ុន Metfone ក៏បានផ្តល់ជាសារយល់ដឹងទាក់ទងដំណឹងក្លែងក្លាយដល់អតិថិជនជាអ្នកប្រើប្រាស់ប្រព័ន្ធទូរស័ព្ទរបស់ក្រុមហ៊ុន Metfone ផងដែរ។
លោករដ្ឋមន្ត្រី បានវាយតម្លៃខ្ពស់ចំពោះការគាំទ្រ និងកិច្ចសហការល្អរបស់ក្រុមហ៊ុន Metfone ជាមួយក្រសួងព័ត៌មាន លើកិច្ចការងារផ្សព្វផ្សាយបានលឿនរហ័ស និងមានគុណភាពល្អ។ ក្រុមហ៊ុន Metfone បានផ្តល់សេវាទូរសព្ទចល័ត និងប្រព័ន្ធ Internet ដែលជាការចូលរួមចំណែកដល់អភិវឌ្ឍន៍សេដ្ឋកិច្ចកម្ពុជា តាមរយៈវិស័យទូរគមនាគមន៍។
លោករដ្ឋមន្ត្រី នេត្រ ភក្ត្រា បានអរគុណដល់ក្រុមហ៊ុន Metfone ដែលបានដាក់បញ្ចូលប្រព័ន្ធផ្សាយទូរទស្សន៍ជាតិកម្ពុជា ទាំងពីរកាណាល់ និង App ក្រសួងព័ត៌មាន រួមទាំងប៉ុស្តីទូរទស្សន៍មួយចំនួនផ្សេងទៀត នៅក្នុងប្រព័ន្ធផ្សាយ TV OTT របស់ក្រុមហ៊ុន ដែលការចូលរូមពង្រីកការផ្សព្វផ្សាយបានកាន់តែទូលំទូលាយ និងមានសារៈសំខាន់ដើម្បីធានាបាននូវសិទ្ធិទទួលបានព័ត៌មានរបស់ប្រជាពលរដ្ឋ ។
ជាមួយនេះ លោករដ្ឋមន្ត្រី ក៏បានអរគុណចំពោះក្រុមហ៊ុន Metfone ដែលបានផ្តល់នូវប្រពន្ធ័ Internet ដោយឥតគតិថ្លៃដល់ទូរទស្សន៍ជាតិកម្ពុជា សម្រាប់ដំណើរការផ្សាយផ្ទាល់នូវព្រឹត្តការណ៍ធំៗ សំខាន់ៗរបស់ជាតិ សកម្មភាពរបស់ថ្នាក់ដឹកនាំកំពូលរបស់ជាតិ និងព្រឹត្តិការណ៍បុណ្យជាតិសំខាន់ៗ តាមរយៈការប្រើប្រាស់ប្រពន្ធ័ Internet របស់ Metfone បានដំណើរទៅយ៉ាងល្អ។
លោករដ្ឋមន្ត្រី នេត្រ ភក្ត្រា ក៏បានអរគុណដល់ក្រុមហ៊ុន Metfone ដែលបានផ្តល់ប្រព័ន្ធ Internet ដល់មជ្ឈមណ្ឌលកុំព្យូទ័រសហគមន៍ នៅក្នុងស្រុកកោះសូទិន ខេត្តកំពង់ចាម ដែលមជ្ឍមណ្ឌលនេះមានបំពាក់កុំព្យូទ័រចំនួន ៤០គ្រឿង ជាជំនួយរបស់រដ្ឋាភិបាលសាធារណរដ្ឋឥណ្ឌា (គម្រោងមេគង្គ-គង្គា) តាមរយៈស្ថានទូតឥណ្ឌាប្រចាំកម្ពុជា ដើម្បីផ្តល់ឱកាសដល់សិស្សានុសិស្ស និងប្រជាពលរដ្ឋបានប្រើប្រាស់សម្រាប់សិក្សាស្រាវជ្រាវឯកសារបង្កើនចំណេះដឹងបន្ថែមទៀត ហើយក៏ជួយបង្កើនធនធានមនុស្សផ្នែកឌីជីថល សម្រាប់ចូលរួមដល់ការអភិវឌ្ឍសហគមន៍ឱ្យកាន់តែរីកចម្រើនបន្ថែមទៀត។
អគ្គនាយករងទទួលបន្ទុកអាជីវកម្ម នៃក្រុមហ៊ុន Metfone បានបញ្ជាក់ពីជំហរក្នុងការបន្តកិច្ចសហប្រតិបត្តិការ និងគាំទ្រដល់សកម្មភាពការងាររបស់ក្រសួងព័ត៌មាន ដែលមានកន្លងមក និងបន្តទៅមុខទៀត ពិសេសគាំទ្រកិច្ចការងារផ្សព្វផ្សាយរបស់ទូរទស្សន៍ជាតិកម្ពុជា ក្នុងការផ្តល់ប្រពន្ធ័ Internet សម្រាប់ការផ្សាយផ្ទាល់ព្រឹត្តការណ៍សំខាន់ៗរបស់ជាតិ និងសកម្មភាពប្រមុខរាជរដ្ឋាភិបាលកម្ពុជា។
លោកអគ្គនាយករងក្រុមហ៊ុន បានជម្រាបជូនពីដំណើរការបង្កើតក្រុមហ៊ុន Metfone តាំងពីឆ្នាំ២០០៦ ហើយប្រតិបត្តិការងារនៅឆ្នាំ២០០៩ រហូតមកដល់ពេលនេះមានរយៈពេល ១៦ឆ្នាំ ហើយក្រុមហ៊ុនបានចូលរួមចំណែកដល់ដំណើរការអភិវឌ្ឍន៍ប្រទេសកម្ពុជាលើវិស័យទូរគមនាគមន៍ តាំងពីតំបន់ទីជនបទដាច់ស្រយាល តំបន់កោះ ដើម្បីអោយប្រជាជនបានប្រើប្រាស់សេវាទូរសព្ទ័ និងប្រពន្ធ័Internet សម្រាប់ការទំនាក់ទំនងមកទីប្រជុំជនបានដោយងាយស្រួល ។ តាមរយៈនេះ Metfone ប្តេជ្ញាចិត្តនឹងនៅតែព្យាយាមផ្តល់នូវសេវាកម្ម និងផលិតផលដ៏ល្អក៏ដូចជាមាតិកាកម្សាន្តដ៏សម្បូរបែប ជូនទៅដល់អតិថិជនគ្រប់រូបផងដែរ៕
