(ភ្នំពេញ)៖ លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន នៅថ្ងៃទី៣ ខែមីនា ឆ្នាំ២០២៥ បានទទួលជួបសម្តែងការគួរសម និងឈ្វេងយល់អំពីក្រមបរិស្ថានកម្ពុជា ជាមួយប្រតិភូសម្ពន្ធ័ឧស្សាហកម្មកៅស៊ូវៀតណាម ប្រចាំកម្ពុជា ដែលដឹកនាំដោយលោក Trương Minh Trung អគ្គនាយករងទី១ នៃសម្ពន្ធ័ឧស្សាហកម្មកៅស៊ូវៀតណាមប្រចាំកម្ពុជា។

លោក Trương Minh Trung បានជម្រាបជូនលោករដ្ឋមន្រ្តីអំពីសមិទ្ធផលការងារក្នុងឆ្នាំ២០២៤ ដែលសម្រេចបាន និងបានរួមចំណែកក្នុងការផ្តល់ឱកាសការងារដល់ប្រជាពលរដ្ឋកម្ពុជាជាច្រើនម៉ឺននាក់ ដោយអនុលោមតាមច្បាប់នៃព្រះរាជាណាចក្រកម្ពុជា។

លោករដ្ឋមន្ត្រីក្រសួងបរិស្ថាន បានថ្លែងអំណរគុណសម្ពន្ធ័ឧស្សាហកម្មកៅស៊ូវៀតណាមប្រចាំកម្ពុជា ដែលបានចូលរួមចំណែកក្នុងសកម្មភាពសេដ្ឋកិច្ចរបស់កម្ពុជា ជាពិសេសការទទួលខុសត្រូវលើការវិនិយោគស្របតាមច្បាប់របស់ព្រះរាជាណាចក្រកម្ពុជា។

លោករដ្ឋមន្ត្រី បានសង្កត់ធ្ងន់ថា ការអនុវត្តច្បាន់ជាធរមានរបស់កម្ពុជា ជាពិសេសក្រមបរិស្ថាន និងធនធានធម្មជាតិ ដែលបានដាក់ចេញ គឺផ្តល់អត្ថប្រយោជន៍ដ៏ល្អសម្រាប់ក្រុមហ៊ុនវិនិយោគទាំងអស់នៅកម្ពុជា។ «បរិស្ថានគឺជាជីវិត» ហើយការណ៍ដែលក្រុមហ៊ុនដែលបានគិតគូរដល់បរិស្ថាន គឺស្ថាប័នទាំងនោះត្រូវបានវាយតម្លៃថាបានចូលរួមចំណែកគោរព ច្បាប់ បទដ្ឋានបរិស្ថានបានត្រឹមត្រូវ និងទទួលខុសត្រូវចំពោះសុខភាពសាធារណៈ អាយុជីវិតរបស់កម្មករ កម្មការិនី និងប្រជាពលរដ្ឋជាធំ ហើយផលិតកម្មរបស់ខ្លួនស្អាត និងទទួលស្គាល់ថាបានគោរព នូវបទដ្ឋានបរិស្ថាន និងបានរួមចំណែកដល់សង្គមនិងសេដ្ឋកិច្ចយ៉ាងពិតប្រាកដ ហើយកិត្តិយសដ៏ថ្លៃថ្នូរទាំងនេះ នឹងផ្សព្វផ្សាយចេញទៅកាន់ក្រុមហ៊ុនដៃគូ អ្នកទទួលទិញ និងអ្នកប្រើប្រាស់៕