(ពោធិ៍សាត់)៖ លោក ស៊ិក ប៊ុណ្ណា រដ្ឋលេខាធិការ តំណាងដ៏ខ្ពង់ខ្ពស់ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នាថ្ងៃទី០៣ ខែមេសា ឆ្នាំ២០២៥ បានអំពាវនាវដល់គ្រប់ស្ថាបន័ពាក់ព័ន្ធទាំងអស់ ពិនិត្យលទ្ឋភាព និងមានវិធានការយ៉ាងតឹងរឹង ក្នុងការអនុវត្តន៍នូវការងារលុបបំបាត់ នូវសេវាសុខាភិបាលខុសច្បាប់ កន្លែងលក់ឱសថគ្មានច្បាប់ ការធ្វើចរាចរណ៍ឱសថក្លែងក្លាយ ត្រួតពិនិត្យអនាម័យសុវត្ថិភាពចំណីអាហារ និងការផ្សព្វផ្សាយពាណិជ្ជកម្ម បំផ្លើសការពិត គ្មានការអនុញ្ញាតពីក្រសួងសុខាភិបាល ដែលជះឥទ្ធិពលដល់ការផ្តល់សេវាសាធារណៈ និងផលប៉ះពាល់ដល់អ្នកប្រើប្រាស់។
លោករដ្ឋលេខាធិការបានថ្លែងបែបនេះ នៅសាលប្រជុំថ្មីរដ្ឋបាលខេត្ត ក្នុងឱកាសបើកសន្និបាតបូកសរុបលទ្ធផលការងារសុខាភិបាល ឆ្នាំ២០២៤ និងលើកទិសដៅ ឆ្នាំ២០២៥ របស់មន្ទីរសុខាភិបាល នៃរដ្ឋបាលខេត្តពោធិ៍សាត់ ដោយបានការចូលរួមពី លោកស្រី ប៉ុក ណាឌី អភិបាលរងខេត្តពោធិ៍សាត់, លោក Song Yonggun នាយកគម្រោង(KOFIH) ប្រចាំកម្ពុជា, លោកប្រធានមន្ទីរសុខាភិបាល នៃរដ្ឋបាលខេត្ត, ថ្នាក់ដឹកនាំមន្ទីរអង្គភាពនានាជុំវិញខេត្ត, កងកម្លាំងប្រដាប់អាវុធទាំង៣, ប្រធានមន្ទីរពេទ្យបង្អែក ស្រុក/ក្រុង, ប្រធានមណ្ឌលសុខភាពទាំង៤៩ ឃុំ/សង្កាត់ និងមន្ត្រីពាក់ព័ន្ធយ៉ាងច្រើនកុះករ។
លោក ស៊ិក ប៊ុណ្ណា រដ្ឋលេខាធិការក្រសួងសុខាភិបាល បានសម្តែងនូវទឹកចិត្តរីករាយ និងអំណរសាទរយ៉ាងកក់ក្តៅ ដែលបានចូល រួមជាអធិបតី ក្នុងពិធីបើកអង្គសន្និបាតបូកសរុបលទ្ធផលការងារសុខាភិបាល ខេត្តពោធិ៍សាត់ ឆ្នាំ២០២៤ និងលើកទិសដៅការងារសម្រាប់ឆ្នាំ២០២៥-២០២៦ ដែលប្រព្រឹត្តទៅរយៈពេល២ថ្ងៃនេះ។ លោកបន្តថារាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកបដោយភាពស្វាហាប់ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដឹកនាំអនុវត្តកម្មវិធីនយោបាយ និងយុទ្ធ សាស្ត្របញ្ចកោណ ដំណាក់កាលទី១ ដោយបន្តរក្សាគង់វង្សនូវស្ថេរភាពនយោបាយ សន្តិសុខ និងសណ្តាប់ធ្នាប់សង្គម ដែលជា មូលដ្ឋានគ្រឹះ នៃការសម្រេចបាននូវវឌ្ឍនភាពថ្មីៗ ក្នុងការបន្តអភិវឌ្ឍសង្គមសេដ្ឋកិច្ច រួមទាំងវឌ្ឍនភាពវិស័យសុខាភិបាលផងដែរ។
លោកបន្ថែមថា ឆ្នាំ២០២៤ ជាឆ្នាំនៃការបន្តបោះជំហានទៅមុខដ៏សំខាន់ នៃការអភិវឌ្ឍមូលធនមនុស្ស គឺការកែលម្អសុខភាព និងសុខុមាលភាពប្រជាជន តាមរយៈការកាត់បន្ថយការឈឺ និងស្លាប់បណ្តាលមកពីជំងឺឆ្លង និងការលើកកម្ពស់សុខភាពបន្តពូជ មាតា ទារក និងកុមារ។ ខណៈដែលកម្មវិធីគោលនយោបាយ អាទិភាពទី១ ក្នុងចំណោមកម្មវិធីគោលនយោបាយអាទិភាព ចំនួន៦របស់រាជរដ្ឋាភិបាល គឺ «ការពង្រីកសេវាថែទាំសុខភាពឆ្ពោះទៅកាន់ការគ្របដណ្តប់សុខភាពជាសកល» ដែលបានកំណត់គោលដៅច្បាស់លាស់ឆ្នាំ២០៣៥៖ គ្របដណ្តប់ប្រជាជនយ៉ាងតិច៨០% ដោយប្រព័ន្ធគាំពារសុខភាពសង្គម, គ្របដណ្តប់សេវាសុខភាពសារវ័ន្តយ៉ាងតិច៨០% និងកាត់បន្ថយការចំណាយប្រាក់ពីហោប៉ៅ លើការថែទាំសុខភាពក្រោម៣៥% នៃការចំណាយសរុប លើសុខភាព។
លោករដ្ឋលេខាធិការ សូមថ្លែងអំណរគុណ ចំពោះបណ្តាអង្គការជាតិ អន្តរជាតិ ម្ចាស់ជំនួយ សប្បុរសជន និងជាពិសេសអាជ្ញាធរគ្រប់លំដាប់ថ្នាក់ ដែលបាននឹងកំពុងសហការ ជួយឧបត្តម្ភគាំទ្រ ទាំងស្មារតី សម្ភារៈ និងផ្តល់នូវបទពិសោធន៍ល្អៗ ក្នុងការរួមចំណែកដល់ការអភិវឌ្ឍន៍វិស័យសុខាភិបាលក្នុងខេត្ត ឱ្យមានការរីកចម្រើន។
ជាមួយគ្នានោះ ក្នុងនាមលោក លោកស្រីទាំងអស់ ជាអ្នកជំនាញខាងវិស័យសុខភាពសាធារណៈ ត្រូវដឹងថាមានកត្តាច្រើនណាស់ ដែលមានឥទ្ធិពលមកលើសមិទ្ធផល នៃវិស័យសុខភាពសាធារណៈ ដែលត្រូវទាមទារឱ្យមានការខិតខំប្រឹងប្រែងយ៉ាងច្រើន ពីមន្ត្រីសុខាភិបាល និងផ្នែកពាក់ព័ន្ធទាំងអស់ មានជាអាទិ៍ រដ្ឋអំណាចគ្រប់លំដាប់ថ្នាក់ ប្រជាជននៅតាមមូលដ្ឋាន និងសហគមន៍ជាដើម។ បន្ថែមពីនោះ តម្រូវការ និងការពង្រីកការសាងសង់អគារថ្មីៗ នៅតាមទីជនបទដាច់ស្រយាល និងការជួយថែរក្សាសន្តិសុខ សោភ័ណភាពឱ្យបានត្រឹមត្រូវ តាមរយៈមន្ត្រីសុខាភិបាល និងសហគមន៍ ជាកត្តាមិនអាចខ្វះបាន ដើម្បីឆ្លើយតបឱ្យបានទាន់ពេលវេលា ទៅនឹងតម្រូវការផ្នែកសុខភាពរបស់ប្រជាពលរដ្ឋ។ មួយវិញទៀតការគ្របដណ្តប់សុខភាព នៃកម្មវិធីមូលនិធិសមធម៌ និង ប.ស.ស ថែទាំសុខភាព រហូតមកដល់បច្ចុប្បន្ននេះ មានវិសាលភាព និងបានរីកធំជាង២ដង គ្របដណ្តប់ប្រជាពលរដ្ឋជាង៧លាននាក់ ដោយធៀបឆ្នាំ២០១៧។
លោករដ្ឋលេខាធិការ សូមស្នើដល់មន្ទីរសុខាភិបាល អាជ្ញាធរដែនដី និងដៃគូពាក់ព័ន្ធទាំងអស់ ត្រូវផ្តោតការយកចិត្តទុកដាក់ ក្នុងការធ្វើអន្តរាគមន៍ និងគ្រប់គ្រងឱ្យបានទាន់ពេលវេលា ត្រឹមត្រូវ និងមានប្រសិទ្ធិភាព ក្នុងករណីមានការផ្ទុះការរាតត្បាតនៃជំងឺឆ្លង ឬព្រឹត្តិការណ៍ផ្សេងៗ ទាក់ទងនឹងសុខភាព ដើម្បីចូលរួមចាត់វិធានការដោះស្រាយ គ្រប់គ្រង និងទប់ស្កាត់ឱ្យមានប្រសិទ្ធិភាព។
លោកក៏សូមអបអរសាទរ ចំពោះលទ្ធផលបេក្ខភាពចំនួន៣ ដែលទទួលបានជ័យលាភីយ៉ាងគាប់ប្រសើរ រួមមាន៖
ទី១៖ មន្ទីរពេទ្យបង្អែកផ្តល់សេវាសំណុំសកម្មភាពបង្គ្រប់កម្រិត១ បាកាន ទទួលបានជ័យលាភីលេខ១ ទូទាំងប្រទេស ជាលើកទី២
ទី២៖ មន្ទីរពេទ្យបង្អែកផ្តល់សេវាសំណុំសកម្មភាពបង្គ្រប់កម្រិត១ ក្រគរ ទទួលបានជ័យលាភីលេខ៦ ទូទាំងប្រទេស
ទី៣៖ មន្ទីរពេទ្យបង្អែកផ្តល់សេវាសំណុំសកម្មភាពបង្គ្រប់កម្រិត៣ ខេត្ត ទទួលបានជ័យលាភីលេខ៣ ទូទាំងប្រទេស។ រីឯវិស័យអប់រំ ពុំទទួលបានជ័យលាភីឡើយ៕
