(តាកែវ)៖ នៅក្នុងជំនួបជាមួយលោក ហ្វៀន ទៀនហាយ សមាជិកគណៈប្រតិបត្តិមជ្ឈឹមបក្ស និងជាលេខាធិការគណៈកម្មាធិការបក្សប្រជាជនខេត្តគៀនយ៉ាង ដែលបានដឹកនាំគណបក្សប្រតិភូ បានមកជូនពរអាជ្ញាធខេត្តតាកែវ ក្នុងពិធីបុណ្យចូលឆ្នាំខាងមុខ នៅថ្ងៃសុក្រ ទី៤ ខែ មេសា ឆ្នាំ២០២៥ លោក វ៉ី សំណាង អភិបាលខេត្តតាកែវ បានស្នើអាជ្ញាធខេត្តគៀនយ៉ាង ធ្វើយ៉ាងណាជួយជំរុញក្រុមអ្នកវិនិយោគ និងក្រុមឈ្មួញជួយទិញកសិកផល ពីបងប្អូនប្រជាពលរដ្ឋខេត្តតាកែវ និងកសិផលពីកម្ពុជាឲ្យកាន់តែច្រើនថែមទៀត។
អភិបាលខេត្តតាកែវ បានថ្លែងបន្តថា «កន្លងមកទំនាក់ទំនងកិច្ចសហប្រតិបត្តិការរវាងខេត្តតាកែវ និងខេត្តគៀនយ៉ាង មានភាពល្អប្រសើរ ជាពិសេសទំនាក់ទំនងរវាងបងប្អូនប្រជាពលរដ្ឋនៅតាមព្រំដែន។ដោយឡែកចំពោះការផ្លាស់ប្ដូរ ពាណិជ្ជកម្មឆ្លងដែន ក៏មានភាពល្អប្រសើរផងដែរ។ ប៉ុន្តែមួយរយៈពេលកន្លងមកនេះ ខណៈវិស័យកសិកម្មរបស់ខេត្តតាកែវ និងនៅក្នុងប្រទេសកម្ពុជា មានការរីកចម្រើន ពិសេសដំណាំស្រូវ វាក៏នាំឲ្យមានបញ្ហាដល់ទីផ្សារនាំចេញ»។
លោក វ៉ី សំណាង បានថ្លែងបន្តថា ដំណាំស្រូវដែលកម្ពុជាធ្វើបាន គឺមួយផ្នែកធំពឹងទៅលើការនាំចេញទៅលក់នៅប្រទេសវៀតណាម ដែលមានទីផ្សារធំទូលាយជាងកម្ពុជា ហើយនៅពេលខាងមុខ នៅពេលដែលខេត្តអាងយ៉ាង និងខេត្តគៀនយ៉ាងរបស់វៀតណាមរួមបញ្ចូលគ្នាជាខេត្តតែមួយ វាធ្វើឲ្យខេត្តយើងទាំង២មានព្រំដែនជាប់គ្នាចំនួន៧២គីឡូម៉ែត្រ ដូច្នេះសូមអាជ្ញាធវៀតណាមជួយសម្របសម្រួលជាមួយក្រុមអ្នកវិនិយោគ និងឈ្មួញវៀតណាម បន្តជួយទិញស្រូវ និងកសិផលជាច្រើនពីប្រជាកសិកខេត្តតាកែវ និងពីប្រទេសកម្ពុជាបន្ថែមទៀត។
ឆ្លើយតបទៅនិងការស្នើសុំរបស់អភិបាលខេត្តតាកែវ, លោក ហ្វៀន ទៀនហាយ សមាជិកគណៈប្រតិបត្តិមជ្ឈឹមបក្ស និងជាលេខាធិការគណៈកម្មាធិការបក្សប្រជាជនខេត្តគៀនយ៉ាង បានលើកឡើងថា កន្លងមកការទិញកសិផលពី ខេត្តតាកែវ និងពីកម្ពុជាទៅកាន់ខេត្តគៀនយ៉ាងគឺត្រូវដឹកជញ្ជូនតាមផ្លូវទឹក ក៏បុន្តែដោយសារស្ថានភាពផ្លូវទឹករាក់ និងកំពង់ផែស្តុកស្រូវមានភាពតូច ដូច្នេះអាជ្ញាធខេត្តគៀនយ៉ាងបានស្ដារប្រឡាយ និងបានធ្វើការពង្រីកកំពង់ផែធំ ជាងមុន ហើយនៅពេលដែលការស្ដារប្រឡាយ និងពង្រីកកំពង់ផែរូចរាល់ យើងរំពឹងថា ការទិញកសិកផលពីកម្ពុជានឹងបានច្រើនជាងមុន ដោយសារតែស្ថានភាពការដឹកជញ្ជូនមានភាពល្អប្រសើរ និងមានកន្លែងស្តុកទុកធំជាងមុន៕
