(សៀមរាប​)៖ តាមរយៈក្របខណ្ឌនៃកិច្ចសហប្រតិបត្តិការរវាងអាជ្ញាធរជាតិអប្សរា ជាមួយស្ថានទូតឥណ្ឌាប្រចាំប្រទេសកម្ពុជា ដោយប្រើប្រាស់ថវិការដ្ឋាភិបាលឥណ្ឌា នៅព្រឹកថ្ងៃទី០៤ ខែមេសា ឆ្នាំ២០២៥ បានបើកវគ្គបណ្តុះបណ្តាលមួយ ស្តីពី ការគ្រប់គ្រងសារមន្ទីរ និងការអភិរក្សវាយនភណ្ឌ ជូនដល់មន្ត្រី បុគ្គលិកចំនួន២០នាក់ នៃនាយកដ្ឋានអភិវឌ្ឍន៍ទេសចរណ៍ និងវប្បធម៌ ដែលកំពុងបំពេញការងារនៅក្នុងសារមន្ទីរក្នុងខេត្តសៀមរាប។

ពិធីនេះ មានការអញ្ជើញចូលរួមពីលោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ និងលោកស្រីបណ្ឌិត Gauri Parimoo Krishnan នាយកស្ថាបនិក អ្នកប្រឹក្សា DMBG LLF អ្នកជំនាញខាងអភិរក្សវាយនភណ្ឌ អ្នកប្រវត្តិសាស្រ្តសិល្បៈ អ្នកប្រឹក្សាគ្រប់គ្រងសារមន្ទីរ សិង្ហបុរី/ឥណ្ឌា។

វគ្គបណ្ដុះបណ្ដាល​នេះ ធ្វេីឡេីងក្នុងគោលបំណង ចែករំលែកបទពិសោធន៍ ពង្រឹងសមត្ថភាព អំពីការអភិរក្ស ថែរក្សា និងការគ្រប់គ្រងសមុច្ច័យ ក៏ដូចជា ការរៀបចំប្លង់ពិព័រណ៍ ជាពិសេសនៅក្នុងសារមន្ទីរវាយនភណ្ឌប្រពៃណីអាស៊ី។

សូមជម្រាបផងដែរថា វគ្គបណ្តុះបណ្តាលស្តីពីការគ្រប់គ្រងសារមន្ទីរ និងការអភិរក្សវាយនភណ្ឌនេះ និងប្រព្រឹត្តិទៅ រយៈពេល៤ថ្ងៃ គឺចាប់ពីថ្ងៃទី០៤ ដល់ថ្ងៃទី០៧ ខែមេសា ឆ្នាំ២០២៥៕