(ស្វាយរៀង)៖ លោក ឃុន រតនា អភិបាលរងក្រុងស្វាយរៀង និងលោកស្រី គង់ បូទុម ប្រធានគណៈកម្មការទ្រទ្រង់សាលាបឋមសិក្សាព្រះសីហនុ នៅព្រឹកថ្ងៃទី៤ ខែមេសា ឆ្នាំ២០២៥នេះ បានអញ្ជើញប្រគល់រង្វាន់ និងប័ណ្ណសរសើរដល់សិស្សទទួលបាននិទ្ទេស A ចំនួន៥៩១នាក់ ស្រីចំនួន៣០៦នាក់ ក្នុងឆមាសលើកទី១ ឆ្នាំសិក្សា២០២៤-២០២៥ នៅសាលាបឋមសិក្សាព្រះសីហនុ ក្រុងស្វាយរៀង ខេត្តស្វាយរៀង។
ក្នុងនាមអាជ្ញាធរក្រុង លោក ឃុន រតនា បានចូលរួមអបអរសាទរជាមួយមាតាបិតា អាណាព្យាបាល និងសិស្សានុសិស្សទាំង៥៩១រូប ដែលទទួលបាននិទ្ទេស A ក្នុងសម័យប្រឡងឆមាសលើកទី១ កាលពីពេលកន្លងទៅថ្មីៗ សម្រាប់ឆ្នាំសិក្សា២០២៤.២០២៥នេះ។ តាមរយៈលទ្ធផលប្រឡងនៅក្នុងសាលាបឋមសិក្សាព្រះសីហនុ ក្រុងស្វាយរៀង នៅដើមឆ្នាំសិក្សានេះ គឺទទួលបានលទ្ធផលល្អប្រសើរ ដោយមានអត្រាសិស្សប្រឡងជាប់សរុប ទទួលបាននិទ្ទេស A ចំនួន៥៩១នាក់ ស្រីចំនួន៣០៦នាក់ ចាប់ពីបច្ចេកទី១ ដល់បច្ចេកទេសទី៦ ដែលមានសិស្សសរុបទាំងអស់ចំនួន១,៤២០នាក់ ក្នុងនោះស្រីចំនួន៦៩២នាក់។
លោកសូមសម្ដែងនូវការអរគុណ ចំពោះមាតាបិតា អាណាព្យាបាលសិស្ស ដែលបានលើកទឹកចិត្ត ជំរុញ តាមដាន និងចូលរួមគាំទ្រគ្រប់សកម្មភាពទាំងឡាយ នៃការសិក្សារបស់កូនចៅរបស់ខ្លួន និងអគុណចំពោះគណៈគ្រប់គ្រងសាលា ព្រមទាំងលោកគ្រូ អ្នកគ្រូទាំងអស់ដែលបានខិតខំយកចិត្តទុកដាក់បង្រៀនសិស្សឲ្យទទួលបានលទ្ធផលដ៏ល្អប្រសើរបែបនេះ។ លោកបានផ្ដាំផ្ញើដល់សិស្សានុសិស្សទាំងអស់ ត្រូវចេះតស៊ូអំណត់ព្យាយាម ដោយយកចិត្តទុកដាក់រៀនសូត្រ ឲ្យបានពូកែថែមទៀត នៅពេលរៀនបន្តនៅថ្នាក់វិទ្យាល័យនាពេលខាងមុខ។
លើសពីនេះ ត្រូវធ្វើជាកូនល្អ សិស្សល្អ មិត្តល្អ និងធ្វេីអំពើណាដែលល្អ ព្រមទាំងមានផលប្រយោជន៍ដល់សង្គមជាតិ។ ត្រូវចៀសឲ្យឆ្ងាយពីគ្រឿងញៀន និងគ្រឿងស្រវឹងគ្រប់ប្រភេទ និងចៀសវាង ឲ្យបាននូវអំពើអបាយមុខផ្សេងៗ ជាពិសេសល្បែងស៊ីសងជាដើម។ ត្រូវបន្តប្រតិបត្តិខ្លួនជាកូនល្អ សិស្សនិស្សិតល្អ និងមិត្តភក្ដិល្អ និងអភិវឌ្ឍន៍ខ្លួនឲ្យក្លាយជាយុវជន ដែលប្រកបដោយគុណសម្បត្តិបួនយ៉ាង គឺបញ្ញា សីលធម៌ សុជីវធម៌ និងកាយសម្បទាមាំមួន។ ត្រូវចូលរួមគោរពប្រតិបត្តិច្បាប់ចរាចរណ៍ ឲ្យបានខ្ជាប់ខ្ជួនដើម្បីសុវត្ថិភាពខ្លួនឯងផង និងអ្នកដទៃផង «បើធ្វើដំណើរតាមម៉ូតូ ត្រូវពាក់មួកសុវត្ថិភាព បើធ្វើដំណើរតាមរថយន្តត្រូវពាក់ខ្សែក្រវ៉ាត់ឲ្យបានត្រឹមត្រូវ»។
លោកអភិបាលរងក្រុង និងលោកស្រីប្រធានគណៈកម្មការទ្រទ្រង់សាលាបឋមសិក្សាព្រះសីហនុ បានចែករង្វាន់ជូនដល់សិស្សានុសិស្សដែលប្រឡងជាប់និទ្ទេស A ទាំង៥៩១នាក់ ក្នុងម្នាក់ៗទទួលបាន៖ ប័ណ្ណសរសើរ១ សៀវភៅសរសេរ១ក្បាល ប៊ិច១ដើម ខ្មៅដៃ១ដើម បន្ទាត់១ និងថវិកា១មុឺនរៀលផងដែរ៕
