(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ប្រធានាធិបតីចិន លោក ស៉ី ជិនពីង នឹងធ្វើដំណើរបំពេញទស្សនកិច្ចផ្លូវការនៅកម្ពុជា នៅពាក់កណ្តាលខែមេសា ឆ្នាំ២០២៥នេះ។

សម្តេចមហាបវរធិបតី ហ៊ុន ម៉ាណែត ក៏បានថ្លែងថា ដំណើរទស្សនកិច្ចរបស់លោក ស៊ី ជិនពីង និងការសម្ពោធដាក់ឱ្យប្រើប្រាស់មជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម គឺបង្ហាញច្បាស់ពីចំណងទំនាក់ទំនងរវាងកម្ពុជា និងចិន និងជាការឆ្លើយតបទៅនឹងការអត្ថាធិប្បាយថា ទំនាក់ទំនងកម្ពុជា-ចិន ធ្លាក់ចុះផងដែរ។

នាឱកាសអញ្ជើញសម្ពោធដាក់ឱ្យប្រើប្រាស់ហេដ្ឋារចនាសម្ព័ន្ធនៅមូលដ្ឋានទ័ពរាម នៅថ្ងៃទី៥ ខែមេសា ឆ្នាំ២០២៥ សម្តេចមហាបវធិបតី ហ៊ុន ម៉ាណែត បានថ្លែងយ៉ាងដូច្នេះថា «ពិធីសម្ពោធថ្ងៃនេះ យើងធ្វើនៅក្នុងពេល ២សប្តាហ៍ទៀត ដែលថ្នាក់ដឹកនាំជាន់ខ្ពស់ចិន ឯកឧត្តម ស៉ី ជិនពីង នឹងមកធ្វើទស្សនកិច្ចជាផ្លូវការនៅកម្ពុជា។ នៅក្នុងគម្រោងទស្សនកិច្ចផ្លូវការ ៣ប្រទេស ម៉ាឡេស៊ី វៀតណាម និងកម្ពុជា ដែលបង្ហាញពីមិត្តភាពរឹងមាំកម្ពុជា-ចិន»។

សម្តេចបានបន្តថា «នៅក្នុងមួយរយៈនេះ គឺមានការអត្ថាធិប្បាយផ្សេងៗ កាសែតផ្សេងៗ អំពីទំនាក់ទំនងកម្ពុជា-ចិន ដែលគេបានថា ទំនាក់ទំនងរដ្ឋាភិបាលថ្មីរបស់កម្ពុជា ជាមួយនឹងរដ្ឋាភិបាលចិន គឺមានការធ្លាក់ចុះជាគំហុក។ អីចឹង ខ្ញុំសូមមិនបកស្រាយទេ អ្វីដែលសំខាន់គឺជាក់ស្តែង ការសម្ពោធ ការហ្វឹកហ្វឺនរួមគ្នា ក៏ដូចជាទស្សនកិច្ចផ្លូវការរបស់ប្រមុខដឹកនាំកំពូលរបស់រដ្ឋាភិបាលចិន គឺបញ្ជាក់សព្វគ្រប់ទៅហើយ»។

ការបំពេញទស្សនកិច្ចជាផ្លូវរដ្ឋនៅតាមបណ្តាប្រទេសអាស៊ាន របស់ប្រធានាធិបតីចិន នេះត្រូវបានគេមើលឃើញថា ជាកិច្ចខិតខំប្រឹងប្រែងដើម្បីពង្រឹងទំនាក់ទំនងជាមួយប្រទេសជិតខាង ចំពេលមានអស្ថិរភាពពិភពលោកកើនឡើងចាប់តាំងពីអាណត្តិទី២ នៃរដ្ឋបាលរបស់ប្រធានាធិបតី អាមេរិក លោក ដូណាល់ ត្រាំ។

បើតាមសារព័ត៌មាន South China Morning Post នៅថ្ងៃទី៣១ ខែមីនា ឆ្នាំ២០២៥ ដែលបានស្រង់ប្រភពពីមន្រ្តីការទូតចិន គឺទស្សនកិច្ចទៅកាន់ប្រទេសទាំងបីនេះ គឺជាទស្សនកិច្ចលើកដំបូងរបស់មេដឹកនាំកំពូលចិន មកកាន់អាស៊ីអាគ្នេយ៍នាឆ្នាំនេះ ក្នុងគោលបំណងពង្រឹងទំនាក់ទំនងជាមួយប្រទេសជិតខាង ស្របពេលតំបន់អាស៊ីអាគ្នេយ៍ កំពុងបារម្ភពីគោលនយោបាយការបរទេសរបស់អាមេរិកជុំវិញពន្ធគយ។

គួរដឹងថា កាលពីឆ្នាំ២០១៦ លោកប្រធានាធិបតីចិនស៊ី ជិនពីន ក៏ធ្លាប់បានធ្វើដំណើរមកដល់ប្រទេសកម្ពុជាម្តងហើយ នៅក្នុងដំណើរទស្សនកិច្ចនៅកម្ពុជា។ ភាគីទាំងបានចុះហត្ថលេខាលើគម្រោងជាច្រើន ដើម្បីជួយអភិវឌ្ឍន៍កម្ពុជាផងដែរ៕