(ព្រះសីហនុ)៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី០៥ ខែមេសា ឆ្នាំ២០២៥ បានថ្លែងណែនាំឱ្យគិតគូរពីការកំណត់កោះឆ្នេរណាប្រើសម្រាប់កិច្ចអភិវឌ្ឍបម្រើសេដ្ឋកិច្ច និងកោះឆ្នេរណា ប្រើសម្រាប់វិស័យកិច្ចការពារជាតិ។

ការថ្លែងបែបនេះរបស់សម្ដេច បានធ្វើឡើងនាឱកាសដែលសម្ដេច អញ្ជើញជាអធិបតីភាពដ៏ខ្ពង់ខ្ពស់សម្ពោធដាក់ឱ្យដំណើរការជាផ្លូវការនូវ មជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម នៅព្រឹកថ្ងៃទី៥ ខែមេសា ឆ្នាំ២០២៥នេះ។

នាឱកាសនោះ សម្តេចនាយករដ្ឋមន្ត្រី បានណែនាំឱ្យធ្វើការសិក្សាការពាររយៈពេលវែងនៅក្នុងដែនសមុទ្រ ដោយកំណត់ឱ្យហើយពីទីតាំងដែលត្រូវដៅ ដើម្បីជជែកជាមួយខាង CDC បែងចែកឱ្យដាច់នូវកោះឬឆ្នេរសម្រាប់ធ្វើរីស៊ត និងកោះឆ្នេរសម្រាប់ទីតាំងសម្រាប់វិស័យការពារជាតិ។

សម្តេចបវរធិបតី បានថ្លែងបន្តថា ទោះបីជាឥឡូវយើងមិនទាន់មានសមត្ថភាពទៅដល់នោះក៏ដោយ ក៏យើងត្រូវតែ re-saved (រក្សាទុកឡើងវិញ)ឱ្យហើយនូវកោះឆ្នេរសម្រាប់វិស័យការពារជាតិ ដើម្បីអនុវត្តពេលវិស័យឯកជនស្នើសុំកោះឬឆ្នេរណាមួយមកវិនិយោគធ្វើរីស៊ត។

ជាមួយគ្នានេះ សម្តេចនាយករដ្ឋមន្ត្រី បានបញ្ជាក់ថា «កន្លងទៅមានក្រុមហ៊ុនខ្លះស្នើសុំអាជ្ញាប័ណ្ណទៅទុកចោល រួចហើយក៏CDCដកហូតមកវិញ ប៉ុន្តែដកហើយប្រាកដជាមានអ្នកផ្សេងសុំហើយ អ៊ីចឹងយើងគិតឱ្យហើយទៅកន្លែងណាដែលដក(អាជ្ញាប័ណ្ណ)ហើយ ទុកសម្រាប់កងទ័ពជើងទឹក សម្រាប់មូលដ្ឋានការពាររបស់យើងរយៈពេលវែង ហើយយើងទុកកន្លែងផ្សេងទៀតឱ្យអ្នកវិនិយោគ ឬសម្រាប់ប្រជាពលរដ្ឋរស់នៅ»។

សម្ដេចបវរធិបតី ហ៊ុន ម៉ាណែត បានមានប្រសាសន៍ថា នេះគឺជាការគិតគូរជាកញ្ចប់ ពីព្រោះថាយើងមិនអាចគិតតែពីកងទ័ព ដោយមិនបានគិតពីសេដ្ឋកិច្ច ពាណិជ្ជកម្មរបស់ប្រជាពលរដ្ឋនោះទេ ដូច្នេះហើយការកំណត់ពីទីតាំង ការកំណត់ពីការប្រើប្រាស់ដីគឺជាកិច្ចការចាំបាច់។

ជាថ្មីម្ដងទៀត សម្តេចនាយករដ្ឋមន្ត្រី បានណែនាំឱ្យ CDC ត្រូវតែពិនិត្យឱ្យបានច្បាស់លាស់លើកិច្ចការនេះ កំណត់កោះឆ្នេរសម្រាប់ធ្វើទីតាំងការពារជាតិ និងទីតាំងសម្រាប់កងទ័ព គឺត្រូវរក្សាជាទីតាំងសាធារណៈក្នុងវិស័យការពារជាតិតែប៉ុណ្ណោះ៕