(ភ្នំពេញ)៖ លោកស្រី យក់ សម្បត្ដិ រដ្ឋលេខាធិការក្រសួងសុខាភិបាល បានថ្លែងអំពាវនាវដល់មជ្ឈមណ្ឌលជាតិកំចាត់រោគរបេង និងហង់សិន ក្នុងភាពជាដៃគូជាមួយនឹងអង្គការ KHANA ព្រមទាំងអង្គការដៃគូដទៃផ្សេងទៀត អាជ្ញាធរគ្រប់លំដាប់ថ្នាក់ និងមន្រ្តីសុខាភិបាលទាំងអស់ បន្ដផ្សព្វផ្សាយអប់រំសុខភាពពីជំងឺរបេង និងការព្យាបាលដោយឥតថ្លៃ ជូនដល់ប្រជាពលរដ្ឋនៅតាមសហគមន៍ ដើម្បីជំរុញឱ្យអ្នកដែលរស់នៅជាមួយអ្នកជំងឺរបេង រួមទាំងកុមារ ដែលមិនទាន់ធ្លាក់ខ្លួនឈឺ ទទួលបាននូវការព្យាបាលបង្ការជំងឺរបេងទាន់ពេលវេលា។

ការអំពាវនាវបែបនេះរបស់លោកវេជ្ជបណ្ឌិត យក់ សម្បត្តិ ក្នុងឱកាសអញ្ជើញជាអធិបតីបើកពិធីប្រកាសដាក់ឱ្យដំណើរការជាផ្លូវការគម្រោង SHIFT-TB និង SAPPHIRE នៅថ្ងៃទី៤ ខែមេសា ឆ្នាំ២០២៥ ដែលមានការអញ្ជើញចូលរួមពីសំណាក់លោក Jaques Pellet ឯកអគ្គរដ្ឋទូតបារាំងប្រចាំព្រះរាជាណាចក្រកម្ពុជា និង ឯកឧត្តម Derek Yip ឯកអគ្គរដ្ឋទូតអូស្រ្តាលីប្រចាំកម្ពុជា។

លោកស្រី យក់ សម្បត្ដិ បានថ្លែងបន្ដថា យើងបានសង្កេតឃើញថា ប្រជាពលរដ្ឋយើងមួយចំនួន នៅតែមិនមានការយល់ដឹងពីការថែទាំ និងព្យាបាលជំងឺរបេងឱ្យបានទូលំទូលាយនៅឡើយ ដែលជាផ្នែកឱ្យប្រជាពលរដ្ឋយើងងាយរងគ្រោះថ្នាក់ដោយជំងឺនេះ ខ្លះបានទៅរកថ្នាំព្យាបាលដោយខ្លួនឯង ខណៈដែលជំងឺរបេងនេះនៅតាមតាមមន្ទីរពេទ្យរដ្ឋយើង ព្យាបាលដោយឥតគិតថ្លៃ បូករួមទាំងថ្នាំព្យាបាលផងនោះ។ ដូច្នេះហើយទើបទារទារឱ្យស្ថាប័នពាក់ព័ន្ធទាំងអស់ ពិសេសមន្ដ្រីសុខាភិបាលយើង បន្ដផ្សព្វផ្សាយអប់រំសុខភាពលើជំងឺរបេងនេះជូនប្រជាពលរដ្ឋយើងទៅតាមសហគមន៍បន្ថែមទៀត។

លោកស្រីបន្ដថា «កន្លងមកបើទោះជាក្រសួងសុខាភិបាលទទួលបានជោគជ័យជាច្រើន ក្នុងកិច្ចសហប្រតិបត្តិការជាមួយដៃគូអភិវឌ្ឍន៍ អង្គការសង្គមស៊ីវិល ក៏វិស័យសុខាភិបាលនៅកម្ពុជា នៅតែជួបបញ្ហាប្រឈមមួយចំនួនផងដែរ ក្នុងនោះរួមមាន ការលក់ និងការចែកចាយឱសថហួសកំណត់ពេលប្រើប្រាស់ជាដើម។ ដូច្នេះខ្ញុំសូមអំពាវនាវឱ្យបញ្ឈប់នូវការចែកចាយនូវឱសថហួសកំណត់ពេលប្រើប្រាស់ ជាពិសេស ឱសថប្រឆាំងមេរោគរបេង ហើយសូមស្នើឱ្យពលរដ្ឋរបស់យើងគប្បីស្វែងរកការថែទាំសុខភាពនៅតាមសេវាសុខភាពសាធារណៈរបស់រដ្ឋ ដែលមានវិជ្ជាជីវៈត្រឹមត្រូវ និងដើម្បីចៀសវាងបាននូវការចំណាយថវិកាលើសលប់ និងមិនចាំបាច់»។

ដូច្នេះការប្រកាសដាក់ឱ្យដំណើរការជាផ្លូវការគម្រោង SHIFT-TB និង SAPPHIRE នាថ្ងៃនេះពិតជាមានអត្ថន័យសំខាន់ខ្លាំងណាស់ ក្រោមការជួយពីរដ្ឋាភិបាលបារាំងតាមរយៈយន្តការ L’Initiative/Expertise France បានផ្តល់ជំនួយហិរញ្ញវត្ថុនូវទឹកប្រាក់សរុបប្រមាណ ១.៦ លាន អឺរូ ដល់អង្គការខាណា និងអង្គការដៃគូសម្រាប់អនុវត្តគម្រោង HIV/AIDS ក្នុងរយៈពេលប្រាំពីរឆ្នាំកន្លងមកនេះ (២០១៧ ដល់ ២០២៣) ។

មន្ដ្រីជាន់ខ្ពស់រូបនេះបានថ្លែងបន្ដថា ការបន្តជួយពីរដ្ឋាភិបាលបារាំង និងរដ្ឋាភិបាលអូស្រ្តាលីដល់ពលរដ្ឋកម្ពុជា គឺជាការរួមចំណែកដ៏សំខាន់ ក្នុងការជួយដល់កម្ពុជា ឆ្ពោះទៅរកការបញ្ចប់ជំងឺរបេង នៅឆ្នាំ២០៣០ ស្របទៅតាមផែនការយុទ្ធសាស្ត្រជាតិបញ្ចប់ជំងឺរបេង ២០២១ ដល់ ២០៣០ ហើយក៏ស្របជាមួយនឹងគោលដៅទីបី «សុខភាព និងសុខមាលភាពល្អ» នៃគោលដៅអភិវឌ្ឍប្រកបដោយចីរភាពរបស់កម្ពុជានាឆ្នាំ២០៣០នេះ ក្នុងការធានាបាននូវការរស់នៅប្រកបដោយផាសុខភាព និងលើកកម្ពស់នូវសុខមាលភាពសម្រាប់ពលរដ្ឋកម្ពុជាគ្រប់រូប នៅគ្រប់វ័យដោយមិនទុកនរណាចោល ដែលជាចក្ខុវិស័យម៉ឹងម៉ាត់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃរាជរដ្ឋាភិបាលកម្ពុជា ក្នុងការឆ្ពោះទៅសម្រេចបានគោលដៅ គ្របដណ្តប់សុខភាពជាសាកល នៅឆ្នាំ២០៣៥។

ក្នុងនាមក្រសួងសុខាភិបាល និងក្នុងនាមរូបលោកស្រីផ្ទាល់ និងជំនួសមុខឱ្យរាជរដ្ឋាភិបាលកម្ពុជា សូមសម្តែងអំណរគុណយ៉ាងជ្រាលជ្រៅចំពោះរដ្ឋាភិបាលបារាំង និងរដ្ឋាភិបាលអូស្រ្តាលី ដែលបានជួយដល់ប្រទេសកម្ពុជាក្នុងវិស័យជាច្រើន ជាពិសេសវិស័យសុខាភិបាលនេះតែម្តង។

គម្រោងពង្រឹងប្រព័ន្ធសុខាភិបាល តាមរយៈសមាហរណកម្មបទអន្តរាគមន៍លើកត្តាហានិភ័យ និងការស្វែងរកករណីរបេង ហៅកាត់ថា គម្រោង (SHIFT-TB) និងគម្រោងភាពជាដៃគូរអាស៊ីប៉ាស៊ីហ្វិក និងទីក្រុងស៊ីដនី សម្រាប់វិស័យសុខាភិបាល បែបនវានុវត្តន៍ និងប្រព័ន្ធអេកូឡូស៊ីមានភាពធន់ ហៅកាត់ថា គម្រោង (SAPPHIRE) មានរយៈពេល៤ឆ្នាំ និងមានថវិកាប្រមាណ ២.៩ លានយូរ៉ូ ត្រូវបានប្រកាសដាក់ដំណើរការជាផ្លូវការ
នៅសណ្ឋាគារហ៊ីម៉ាវារី រាជធានីភ្នំពេញ នាថ្ងៃទី៤ ខែមេសា ឆ្នាំ ២០២៥។ គម្រោងទាំងពីរនេះ នឹងអនុវត្តដោយអនុលោមជាមួយនឹងផែនការយុទ្ធសាស្ត្រជាតិកំចាត់រោគរបេងឆ្នាំ២០២១-២០៣០ យុទ្ធសាស្ត្របញ្ចប់ជំងឺរបេងរបស់អង្គការសុខភាពពិភពលោក និងយុទ្ធសាស្ត្រជំងឺរបេងសាកលដើម្បីកាត់បន្ថយបន្ទុកជំងឺរបេងនៅកម្ពុជា៕