(ពោធិ៍សាត់)៖ លោក ខូយ រីដា អភិបាលខេត្តពោធិ៍សាត់ នាថ្ងៃទី០៥ ខែមេសា ឆ្នាំ២០២៥នេះ នៅសាលប្រជុំថ្មីរដ្ឋបាលខេត្ត បានអញ្ជើញជួបសំណេះសំណាល ជាមួយមន្ត្រីរាជការ មន្ត្រីជាប់កិច្ចសន្យា និងបុគ្គលិកហាត់ការ ចំណុះឱ្យរចនាសម្ព័ន្ធរដ្ឋបាលខេត្ត នៅក្នុងឱកាសអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ពស.២៥៦៨ ដែលនឹងខិតជិតមកដល់នាពេលខាងមុខ។
ពិធីនេះបានការចូលរួម ពីសំណាក់លោក ហេង សុភាណា និងលោក ហៀម ឃួន អភិបាលរងខេត្ត, លោក លោកស្រី នាយក នាយករងរដ្ឋបាលសាលាខេត្ត, នាយក នាយករងទីចាត់ការ, ប្រធាន អនុប្រធាន អង្គភាព, ប្រធាន អនុប្រធានការិយាល័យ, មន្ត្រីរាជការ កងកម្លាំងប្រដាប់អាវុធ និងមន្ដ្រីជាប់កិច្ចសន្យាសាលាខេត្តយ៉ាងច្រើនកុះករ។
លោក ខូយ រីដា អភិបាលខេត្តពោធិ៍សាត់ បានសម្តែងនូវការកោតសរសើរ និងវាយតម្លៃខ្ពស់ ជូនចំពោះថ្នាក់ដឹកនាំ មន្ត្រីជាប់កិច្ចសន្យា និងបុគ្គលិកហាត់ការ ចំណុះឱ្យរចនាសម្ព័ន្ធរដ្ឋបាលខេត្តពោធិ៍សាត់ទាំងអស់ ដែលបានខិតខំបំពេញការងារកន្លងមក ប្រកបដោយស្មារតីទំនួលខុសត្រូវខ្ពស់។
លោកអភិបាលបានស្នើឱ្យបន្តការខិតខំពង្រឹងកិច្ចការស្នូល ប្រកបដោយភាពឆ្លាតវៀងវៃ ទៅតាមការិយាល័យរៀងៗខ្លួន និងបន្តពង្រឹងសហការសាមគ្គីភាពផ្ទៃក្នុង សម្តៅពង្រឹង និងពង្រីកប្រសិទ្ធភាព ការផ្តល់សេវាសាធារណៈជូនប្រជាពលរដ្ឋ ឆ្លើយតបទៅនឹងគោលនយោបាយរបស់រាជរដ្ឋាភិបាល។
លោក ខូយ រីដា បានលើកឡើងថា បន្ទាប់ពីបានមកកាន់មុខតំណែង ជាអភិបាលខេត្ត រូបលោកផ្ទាល់បានប្តេជ្ញាចិត្តយ៉ាងមុតមាំ សំដៅធ្វើយ៉ាងណាឱ្យខេត្តពោធិ៍សាត់ប្រែមុខប្រែមាត់ ឱ្យកាន់តែរីកចម្រើនមួយកម្រិត ជាពិសេសបានដាក់ចេញនូវទស្សនវិស័យ ក្នុងឆ្នាំ២០២៦ ខេត្តពោធិ៍សាត់គឺគ្មានសំរាម ដើម្បីលើកមុខមាត់ខេត្តជាប្រវត្តិសាស្ត្រ និងដើម្បីអបអរសាទរព្រឹត្តិការណ៍ នៃបុណ្យទន្លេ លើកទី១០ ដែលខេត្តពោធិ៍សាត់ត្រៀមធ្វើជាម្ចាស់ផ្ទះ ក្នុងឆ្នាំ២០២៦ខាងមុខ។ ជុំវិញកិច្ចការទាំងនេះ ទាមទាឱ្យមានការចូលរួម ពីគ្រប់ភាគីពាក់ព័ន្ធ មន្ត្រីរាជការ និងប្រជាពលរដ្ឋ រួមទាំងរដ្ឋបាលស្រុក ក្រុង មន្ទីរ អង្គភាពជុំវិញខេត្ត និងវិស័យឯកជន។
លោកក៏បានអំពាវនាវដល់មន្ត្រីរាជការ មន្ត្រីជាប់កិច្ចសន្យា និងបុគ្គលិកហាត់ការ មន្ត្រីរាជការ ក៏ដូចបងប្អូនប្រជាពលរដ្ឋទូទាំងខេត្ត គប្បីបង្កើនការប្រុងប្រយត្ន័ នូវរាល់ហានិភ័យ ដូចជាអគ្គិសភ័យ គ្រោះថ្នាក់ចរាចរណ៍ ចូលរួមអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងចូលរួមឱ្យបានច្រើនកុះករ នៅលើបុរីវប្បធម៌កោះសំពៅមាស និងនៅមុខសាលាខេត្តពោធិ៍សាត់ ក្នុងព្រឹត្តិការណ៍សង្គ្រាន្តថ្ងៃចូលឆ្នាំ ដើម្បីទទួលអំណរឆ្នាំថ្មី។
ក្នុងឱកាសនោះ លោក ខូយ រីដា ក៏បានឧបត្ថម្ភ ដល់មន្ត្រីរាជការ មន្ត្រីកិច្ចសន្យា និងបុគ្គលិកហាត់ការ ចំណុះឱ្យរចនាសម្ព័ន្ធរដ្ឋបាលខេត្ត ចំនួន១៩១នាក់ ក្នុងម្នាក់ៗទទួលបាន ថវិកាចំនួន៤០ម៉ឺនរៀល ក្រណាត់សំពត់មួយឈុត និងអង្ករ២០គីឡូក្រាមផងដែរ៕
