(កំពង់ស្ពឺ)៖ ដោយគិតគូរអំពីសុខទុក្ខចំពោះកងកម្លាំងទាំងអស់, លោកឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានចាត់ឲ្យតំណាងចុះសួរសុខទុក្ខកងកម្លាំងទាំង៣ប្រភេទ ដឹកនាំដោយលោក សេង ញ៉ក់ តំណាងរាស្ត្រមណ្ឌលខេត្តកំពង់ស្ពឺ និងមានការចូលរួមលោក យឹម សុខុម ប្រធានក្រុមប្រឹក្សាខេត្ត, លោក ស៊ីម រតនៈ អភិបាលរងខេត្ត ព្រមទាំងកងកម្លាំងជាង៤០០នាក់ នៅក្នុងបរិវេណសាលាខេត្តកំពង់ស្ពឺ ព្រឹកថ្ងៃទី៥ ខែមេសា ឆ្នាំ២០២៥។

លោក សេង ញ៉ក់ បានផ្តាំផ្ញើការសាកសួរសុខទុក្ខពីសំណាក់លោកឧបនាយករដ្ឋមន្ត្រី ហ៊ុន ម៉ានី ជូនចំពោះបងប្អូនកងកម្លាំងទាំងអស់ ដែលមានវត្តមាននៅទីនេះ។ លោកសូមផ្តាំការសូមអធ្យាស្រ័យផងដែរ ដែលលោកឧបនាយក រដ្ឋមន្រ្តី មិនបានអញ្ជើញមកដោយផ្ទាល់នៅថ្ងៃនេះ ប៉ុន្តែចិត្ត និងការគោរពស្រឡាញ់ចំពោះវីរៈភាពរបស់កងកម្លាំង នៃខេត្តកំពង់ស្ពឺជានិច្ច ទោះមានភាពមមាញឹកក្នុងការងារយ៉ាងណាក៏ដោយលោក មិនដែលភ្លេចពីសុខទុក្ខបងប្អូន កងកម្លាំងយើង កំពុងឈរជើងបំពេញបេសកកម្មដ៏ឧត្តុង្គឧត្តម ជាពិសេសក្នុងឱកាសបុណ្យចូលឆ្នាំប្រពៃណីជាតិខាងមុខ។

តំណាងរាស្ត្រ បានលើកឡើងដោយសង្កត់ធ្ងន់ថា «កងកម្លាំងមិនមែនជាមនុស្សយន្តទេ គាត់ក៏ចេះហត់ ចេះក្តៅ ចេះរងារ ចេះចង់ជួបគ្រួសារក្នុងពេលបុណ្យទានដែរ តែនៅពេលដែលយើងពាក់ឯកសណ្ឋានជាកងកម្លាំង យើងត្រូវ បានប្រគល់នូវតួនាទីយ៉ាងសំខាន់មួយ ដែលតម្រូវឲ្យយើងបង្កើនការប្រុងប្រយ័ត្ន ដើម្បីធានាសន្តិសុខ សណ្តាប់ធ្នាប់ សុវត្ថិភាព និងភាពសុខសប្បាយរបស់ប្រជាពលរដ្ឋ ដាច់ខាតត្រូវការការពារថែរក្សា សុខសន្តិភាព និងសុវត្ថិភាព ជូនប្រជាជន និងប្រទេសជាតិ។ ជាពិសេសដោយសារតែមានកងកម្លាំងទាំងអស់គ្នានេះហើយ ទើបធ្វើឱ្យប្រជាពលរដ្ឋរស់នៅដោយសេចក្តីសុខ យើងអាចនិយាយបានថា សេចក្តីសុខរបស់ប្រទេសជាតិ ពិតជាមិនអាចកាត់ផ្តាច់ចេញ ពីកិច្ចខិតខំប្រឹងប្រែងបំពេញការងាររបស់កងកម្លាំងប្រដាប់អាវុធរបស់យើងបានឡើយ»។

លោក ស៊ឹម រតនៈ អភិបាលរងខេត្តកំពង់ស្ពឺ ជំនួសមុខ នៃរដ្ឋបាលខេត្តកំពង់ស្ពឺ និងកម្លាំងប្រដាប់អាវុធទាំង៣ប្រភេទ ដឹងគុណយ៉ាងជ្រាលជ្រៅលោកឧបនាយករដ្ឋមន្ត្រី ហ៊ុន ម៉ានី និងអ្នកតំណាងរាស្ត្រទាំងអស់ ដែលតែងយកចិត្ត ទុកដាក់ចំពោះសុខទុក្ខកងកម្លាំងរបស់យើង ដោយលោកចាត់ទុកកងកម្លាំងប្រដាប់អាវុធ គឺជាដាវ និងខែលការពារជាតិដ៏រឹងមាំសម្រាប់រារាំង រាល់សកម្មភាពបំផ្លិចបំផ្លាញនានាដែលប៉ះពាល់ ភាពសុខដុមរមនារបស់ប្រជាពលរដ្ឋ និងការពារសុខសន្តិភាព ដែលជាសន្តិភាពដ៏ពេញលេញ និងទទួលបានមកដោយលំបាក ហើយក៏ជាឬសគល់ នៃការអភិវឌ្ឍលើគ្រប់វិស័យ និងនាំកម្ពុជាឱ្យឆ្ពោះទៅត្រើយនៃវឌ្ឍនភាព វិបុលភាព ថ្កុំថ្កើងរុងរឿង ខ្លាំងក្លាថែមទៀត។

អំណោយដែលត្រូវផ្តល់ជូនក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខរួមមាន៖ ក្នុងមួយអង្គភាពៗទទួលបាន ថវិកាចំនួន៩,០០០,០០០រៀល, អង្ករចំនួន ៥តោន, មីចំនួន២០០កេស, ទឹកបរិសុទ្ធចំនួន១០០កេស , ភេសជ្ជៈចំនួន១០០កេស៕