(សៀមរាប)៖ ព្រះសង្ឃនៅស្រុកសូទ្រនិគម នៅរសៀលថ្ងៃទី៤ ខែមេសា ឆ្នាំ២០២៥ បាននិមន្តតាមដងផ្លូវ ស្រោចទឹក និងប្រោះព្រហ្មដល់ប្រជាពលរដ្ឋ ដើម្បីទទួលបានសេចក្តីសុខចម្រើន ក្នុងឱកាសបុណ្យចូលឆ្នាំថ្មី ដែលជាជំនឿ ទំនៀមទម្លាប់របស់ប្រជាពលរដ្ឋនៅឃុំសំរោង ស្រុកសូទ្រនិគម ខេត្តសៀមរាប នៅពេលជិតដល់បុណ្យចូលឆ្នាំថ្មីប្រពៃណីជាតិខ្មែរមកដល់ គឺប្រជាពលរដ្ឋក្នុងឃុំសំរោងទាំងមូល តែងតែនិមន្តព្រះសង្ឃស្រោចទឹក ប្រោះព្រហ្មនៅតាមផ្ទះនិមួយៗ ព្រមគ្នាតែម្តងដើម្បីបណ្តេញគ្រោះចង្រៃឆ្នាំចាស់ឲ្យហូរទៅតាមទឹក។

តាមការបញ្ជាក់របស់លោកយាយ ភី រស់នៅភូមិស្ទឹង ឃុំសំរោង ស្រុកសូទ្រនិគម ខេត្តសៀមរាប បានឲ្យដឹងថា ព្រះសង្ឃនិមន្តមកសូត្រមន្ត ស្រោចទឹកដល់ប្រជាពលរដ្ឋនៅតាមបណ្តាភូមិនេះ គឺជាជំនឿមួយដែលប្រជាពលរដ្ឋនៅក្នុងឃុំនេះ បានគោរពប្រតិបត្តិតាំងពីដូនតាជំនាន់មុនមក។

លោកបន្តថា ដោយអ្នកភូមិមានជំនឿថា ការនិមន្តព្រះសង្ឃមកស្រោចទឹកនេះ ជាការរំដោះគ្រោះចង្រៃឆ្នាំចាស់ និងរឿងអាក្រក់ៗ ដែលកំពុងកើតមានឲ្យហូរទៅតាមទឹក និងសុំនូវសេចក្តីសុខសប្បាយសម្រាប់ក្រុមគ្រួសារក្នុងឆ្នាំថ្មី ដែលបានឈានចូលមកដល់ខាងមុខ។

លោកយាយបានបន្តថា កាលពីមុនការនិមន្តព្រះសង្ឃស្រោចទឹកនេះ ធ្វើតែនៅក្នុងភូមិចំណុះជើងវត្តប៉ុណ្ណោះ ប៉ុន្តែនៅរយៈពេល៣ឆ្នាំចុងក្រោយនេះ ដោយមានការគោរព មានជំនឿ និងមានការសំណូមពីពុទ្ធបរិស័ទផងនោះ ព្រះតេជគុណ ថង ចន្ថា ព្រះគ្រូចៅអធិការវត្តសំរោង បានដឹកនាំព្រះសង្ឃបន្តនិមន្តស្រោចទឹកប្រោះព្រហ្មឲ្យប្រជាពលរដ្ឋរហូតទៅដល់៥ឃុំ មានដូចជា៖ ឃុំសំរោង ឃុំពពេល ឃុំចាន់ស ឃុំដំដែក និងឃុំតាយ៉ែក ស្ថិតនៅស្រុកសូទ្រនិគម ហើយឃើញថា ប្រជាពលរដ្ឋចាស់ក្មេងមានការចូលរួមយ៉ាងច្រើន។

លោកយាយបានបន្តថា ឲ្យតែវេលានេះ បើបាននិមន្តព្រះសង្ឃមកស្រោចទឹកទេ គឺប្រជាពលរដ្ឋនៅមិនសុខ មិនអស់ចិត្ត មិនស្រឡះក្នុងខ្លួន ដែលនេះហើយ គឺជាជំនឿ និងការគោរពប្រតិបត្តិផង​ដែរ។

លោក ជា ប៉ុន នាយកសាលាអនុវិទ្យាល័យពពេល បានឲ្យដឹងដែរថា ពិធីនេះតែងតែធ្វើជារៀងរាល់ឆ្នាំ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខិតចូលមកដល់។ លោកបន្តថា មូលហេតុដែលប្រជាពលរដ្ឋនៅក្នុងឃុំសំរោងនេះ តែងតែមានការជឿ គោរពប្រតិបត្តិធ្វើពិធីនេះ គឺដោយសារតែពួកគាត់ធ្វើទៅតែងតែជួបនូវសេចក្តីសុខចម្រើន ដោយនៅក្នុងពិធីនេះ មិនត្រឹមតែស្រោចទឹកឲ្យតែមនុស្សប៉ុណ្ណោះទេ សូម្បីតែសម្ភារប្រើប្រាស់ ដូចជា៖ ម៉ូតូ ឡាន ក៏បានឲ្យព្រះសង្ឃប្រោះព្រហ្មឲ្យផងដែរ ដើម្បីឲ្យពេលធ្វើដំណើរទៅណាជួបតែសុវត្ថិភាព ណិងសេចក្តីសុខ។

លោក ជា ប៉ុន បានបន្តថា លោកចង់ឲ្យកូនចៅជំនាន់ក្រោយបន្តធ្វើពិធីនេះតទៅមុនទៀត ព្រោះវាជាជំនឿ និងទំនៀមទម្លាប់ ដែលបានធ្វើឲ្យអ្នកភូមិបានសេចក្តីសុខ។

ព្រះតេជគុណ ជឿត គឹមអាង ព្រះគ្រូសូត្រស្តាំវត្តសំរោង មានសង្ឃដីកាថា ជារៀងរាល់ឆ្នាំ ព្រះសង្ឃគង់នៅវត្តសំរាង តែងតែបាននិមន្តទៅស្រោចទឹកដល់ពុទ្ធបរិស័ទ ដោយធ្វើឡើងរយៈពេល៧ថ្ងៃ ប៉ុន្តែសម្រាប់ឆ្នាំនេះ គឺធ្វើឡើងចំនួន៥ឃុំ ចាប់ពីថ្ងៃទី១ ខែមេសា រហូតទៅដល់ថ្ងៃស្រង់ព្រះ ដែលធ្វើឡើងនៅថ្ងៃទី៣ ដែលត្រូវនឹងថ្ងៃឡើងស័ក ថ្ងៃចុងក្រោយ នៃពិធីបុណ្យចូលឆ្នាំថ្មីប្រពៃណីខ្មែរ។

ព្រះតេជគុណបន្តថា ក្នុង១ថ្ងៃព្រះសង្ឃនិមន្តទៅស្រោចទឹក និងប្រោះព្រហ្មដល់ប្រជាពលរដ្ឋជាច្រើននៅតាមភូមិនិមួយៗ ដោយព្រះសង្ឃនិមន្តចាប់ពីម៉ោង២ទៅ ហើយប្រជាពលរដ្ឋបានត្រៀមលក្ខណៈដងទឹកដាក់ធុង ចានដែក ដោយមានផ្ការៀបចំរួចរាល់ រងចាំព្រះសង្ឃនិមន្តទៅដល់។

សូមបញ្ជាក់ថា ប្រជាជនខ្មែរ មានជំនឿតៗគ្នាមកយូរមកហើយថា ស្រង់ព្រះទាំងព្រះបដិមាថ្ម និងព្រះរស់ សុទ្ធតែទទួលបានមកវិញនូវសេចក្ដីសុខចម្រើន ត្រជាក់ត្រជុំ។ ទឹកតំណាងភាពត្រជាក់ ដូច្នេះហើយ នៅពេលស្រោចស្រពលើរាងកាយជនណាម្នាក់ហើយនឹងបានត្រជាក់ ទាំងអ្នកស្រោចស្រពគេ និងគេស្រោចឲ្យសុទ្ធតែសប្បាយចិត្ត និងជឿជាក់ថានឹងទទួលបាននូវបុណ្យកុសលល្អទៅថ្ងៃខាងមុខ និងជាតិក្រោយ។

ដូចនេះហើយ បានជាប្រជាពលរដ្ឋនៅក្នុងឃុំសំរោង និងឃុំពពេលនេះ គោរពប្រតិបត្តិបន្តនិមន្តព្រះសង្ឃស្រោចទឹក នៅតាមផ្ទះនិមួយៗព្រមគ្នា នឹងបានក្លាយជាប្រពៃណី និងទម្លាប់របស់អ្នកភូមិតរៀងរហូតមក៕