(សៀមរាប)៖ សាលាអនុគណក្រុងសៀមរាប សហការជាមួយមន្ទីរធម្មការ និងសាសនាខេត្ត ដោយមានការទទួលបានគាំទ្រពីព្រះសង្ឃ និងពុទ្ឋបរិស័ទមកពីប្រទេសភូមា បានរៀបចំពិធីកោរសក់ បំបួសកុលបុត្រ ចំនួន១០៨រូប នៅវត្តទេពពោធិវង្ស ក្រុងសៀមរាប ខេត្តសៀមរាប នៅរសៀលថ្ងៃទី៤ ខែមេសា ឆ្នាំ២០២៥ ក្រោមវត្តមានព្រះវិជ័យរង្សី បណ្ឌិត ឡាច លាង ព្រះរាជាគណៈកិត្តិយស ព្រះធម្មធរគណខេត្ត ជាព្រះអនុគណក្រុងសៀមរាប និងជាព្រះចៅអធិការវត្តទេពពោធិវង្ស និងលោក ឌី រ៉ាដូ អភិបាលរងខេត្តសៀមរាប។
ពិធីកោរសក់ បំបួសកុលបុត្រទាំង១០៨រូបនេះ ប្រព្រឹត្តទៅមានរយៈពេល៣ថ្ងៃ ចាប់ពីថ្ងៃទី០៤ ដល់ថ្ងៃទី០៦ ខែមេសា ឆ្នាំ២០២៥ ដើម្បីអប់រំសីលធម៌ក្នុងរយៈពេលខ្លីជូនដល់កុលបុត្រទាំងនេះ។
ក្នុងឱកាសនោះ លោក ឌី រ៉ាដូ មានប្រសាសន៍ថា ពិធីកោរសក់ បួងសក់ដល់កុលបត្រកុលធីតានាពេលនេះ គឺជាប្រពៃណី ទំនៀមទម្លាប់ខ្មែរដ៏យូរលង់ណាស់មកហើយ ដែលជាកម្មវិធីមួយត្រូវធ្វើមុនពេលបួសតាមក្រឹត្យ ក្រមព្រះវិន័យព្រះពុទ្ធសាសនា។
លោកបន្តថា ការស្ម័គ្រចិត្តលះបង់សក់ ជាទីស្រឡាញ់នេះ គឺជាការលះបង់មួយដ៏អស្ចារ្យ ក្នុងភាពជាយុវវ័យ ដើម្បីសាងផ្នួសបួស សងគុណ តបគុណលោកឪពុក អ្នកម្តាយ និងអ្នកមានគុណទាំងឡាយ ជាពិសេសបានបំពេញនាទីជាកូនប្រុស តាមប្រពៃណីខ្មែរ។
លោកបានបន្តថា តាមទំនៀម ប្រពៃណីខ្មែរ កូនប្រុសត្រូវតែសាងផ្នួសបួសជាភិក្ខុ ឬសាមណេរ ទោះក្នុងរយៈពេលវែង ឬរយៈពេលខ្លី ត្រូវបានគេឲ្យតម្លៃថា «បួសសាមណេរសងគុណម្ដាយ ហើយបួសភិក្ខុសងគុណឪពុក» ទៀតផង។ លោកបន្តទៀតថា នៅក្នុងខេត្តសៀមរាប វិស័យពុទ្ធសាសនា បានរួមចំណែកធ្វើឲ្យមានការរីកចម្រើនទាំងផ្នែកហេដ្ឋារចនាសម្ព័ន្ធរូបវន្ត វិស័យគ្រប់គ្រង ការផ្សព្វផ្សាយធម៌ វិន័យព្រះពុទ្ធសាសនា ក៏ដូច៖ ជាវិស័យ ពុទ្ធិកសិក្សាផងដែរ។
លោកបន្ថែមថា ទោះបីជាមានការរីកចម្រើន ដូចបានរៀបរាប់ខាងលើក៏ដោយ ក៏យើងត្រូវតែធ្វើឲ្យប្រសើរឡើងថែមទៀត នូវកត្តាសំខាន់ៗមួយចំនួន ដូចជា៖ ពង្រឹងការអនុវត្តនូវខ្លឹមសារអនុសំវច្ឆរមហាសន្និបាតមន្ត្រីសង្ឃឲ្យមាន ប្រសិទ្ធភាព ការពង្រឹងតួនាទី និងភារកិច្ច មន្ត្រីសង្ឃគ្រប់ថ្នាក់ឲ្យកាន់តែប្រសើរឡើង កាត់បន្ថយអធិករណ៍ក្នុងវត្តអារាមឲ្យកាន់តែតិចទៅៗ និងឈានទៅលុបបំបាត់ទាំងស្រុង ការពង្រឹងប្រសិទ្ធភាពនៃការគ្រប់គ្រងវត្តអារាម និងការពង្រឹងពុទ្ធិកសិក្សាគ្រប់ភូមិសិក្សា។
លោកបញ្ជាក់ថា ការបង្កើនគំនិតបណ្តុះគុណធម៌ សីលធម៌ ចរិយាធម៌ឲ្យមានទឹកចិត្ត ស្រឡាញ់គោរព សណ្តោស និងការដឹងគុណនៃអ្នកមានគុណទាំងឡាយរបស់ពលរដ្ឋខ្មែរ។ ជាមួយនេះដែរលោក ឌី រ៉ាដូ ក៏បាននាំយកបច្ច័យរបស់ឯកឧត្តមអភិបាលខេត្ត ចំនួន២លានរៀល ដើមី្បយកទៅប្រើប្រាស់ក្នុងពិធីកោរសក់ បំបួសកុលបុត្រនេះផងដែរ៕
