(កំពត)៖ នៅថ្ងៃទី០៥ ខែមេសា ឆ្នាំ២០២៥នេះ លោកបណ្ឌិត ហ៊ុន សុខា ទីប្រឹក្សារបស់សម្តេចតេជោ ហ៊ុន សែន ប្រធានព្រឹទ្ធសភា អញ្ជើញជាអធិបតីក្នុងពិធីសំណេះសំណាលសិស្សានុសិស្ស លោកគ្រូ អ្នកគ្រូ និងអបអរសាទរសង្ក្រាន្តឆ្នាំថ្មី របស់វិទ្យាល័យវត្តអង្គរជ័យ ស្ថិតនៅឃុំអង្គរជ័យ ស្រុកអង្គរជ័យ ខេត្តកំពត។
ពិធីនេះមានការចូលរួមពី លោកស្រី អ៊ូច ពៅ, លោក ហុង ភាព, លោក ប៊ុន ច័ន្ទថុល គណៈប្រតិភូអមដំណើរជាច្រើនរូបទៀត និងលោក មួង នឿន អភិបាលស្រុកអង្គរជ័យ អាជ្ញាធរស្រុក កងកម្លាំងទាំងបី លោកគ្រូ អ្នកគ្រូ សិស្សានុសិស្ស អាណាព្យាបាលសិស្ស ចំនួន ១០៤៧នាក់។
លោក អៀម ប្រឹម នាយកសាលាវិទ្យាល័យវត្តអង្គរជ័យ បានឡើងអានរបាយការណ៍ស្វាគមន៍គណៈអធិបតី ព្រមទាំងអានអំពីប្រវត្តិរបស់វិទ្យាល័យវត្តអង្គរជ័យ តាំងពីចាប់ផ្តើម រហូតមកដល់បច្ចុប្បន្ននេះ។
ឆ្លៀតក្នុងឱកាសនោះផងដែរ លោកបណ្ឌិត ហ៊ុន សុខា បានណែនាំនូវចំណុចមួយចំនួន ដែលអាចឱ្យមាននូវការបង្កើតសាលានេះបាន គឺសន្តិភាព ប្រសិនជាគ្មានសន្តិភាព នោះសិស្សានុសិស្សទាំងអស់មិនអាចមកចូលសាលាសិក្សាបាននោះឡើយ ដោយលើកឧទាហរណ៍នៅសម័យប៉ុលពត ទោះបីជាចេះអក្សរក៏មិនហ៊ាននឹងប្រាប់គេថាចេះដែរ ហើយជំនាន់នោះគឺគ្មានការសិក្សារៀនសូត្រនោះឡើយ ក៏ព្រោះតែគ្មានសន្តិភាពដូចការដឹកនាំប្រកបដោយភាពវៃឆ្លាត និងប៉ិនប្រសប់របស់ថ្នាក់ដឹកនាំ បាននាំមកនូវការអភិវឌ្ឍន៍រីកចម្រើនលើគ្រប់វិស័យ ក្នុងនោះក៏មានវិស័យអប់រំផងដែរ។
លោកបណ្ឌិត បានបន្ថែមថា នៅក្នុងខេត្តកំពត ជាពិសេសស្រុកអង្គរជ័យ គឺមានលោក ប៉ែន ស៊ីម៉ន អ្នកតំណាងរាស្ត្រមណ្ឌលកំពត លោកបានកសាងនូវសមិទ្ធផលជាច្រើនដែលជាទីមោទនសម្រាប់អ្នកកំពត និងប្រជាពលរដ្ឋទូទាំងខេត្តកំពត តែទោះជាយ៉ាងណាលោកនឹងខិតខំស្វះស្វែងរកជំនួយពីមជ្ឈដ្ឋាននានា ដើម្បីរួមចំណែកជាមួយថ្នាក់ដឹកនាំ ក្នុងការបម្រើសង្គមជាតិ មាតុភូមិ។
លោកបណ្ឌិត ហ៊ុន សុខា បានផ្តាំផ្ញើរទៅសិស្សានុសិស្សទាំងអស់ ត្រូវខិតខំសិក្សារៀនសូត្រ ដើម្បីជាសសរទ្រូងរបស់ប្រទេសជាតិ គឺដឹកនាំ និងទទួលការងារបន្តឱ្យកម្ពុជាទៅជាប្រទេសអ្នកមាននៅឆ្នាំ២០៥០ តាមគោលនយោបាយដឹកនាំរបស់រាជរដ្ឋាភិបាល ដែលបានដាក់ចេញ និងមានគោលដៅយ៉ាងច្បាស់លាស់៕
