(កៀវ)៖ មន្ត្រីក្នុងតំបន់និយាយថា ការវាយប្រហាររបស់រុស្ស៉ី បានសម្លាប់ជនស៉ីវិល ១៩នាក់នៅទីក្រុង Kryvyi Rih របស់អ៊ុយក្រែនកាលពីថ្ងៃសុក្រ ប៉ុន្តែក្រសួងការពារជាតិរុស្ស៉ីចេញមកអះអាងថា ខ្លួនកំណត់គោលដៅលេីបណ្តុំយោធានៅទីនោះ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៥ ខែមេសា ឆ្នាំ ២០២៥។

អភិបាលតំបន់បានឱ្យដឹងថា មីស៉ីលមួយគ្រាប់បានវាយប្រហារទីតាំងលំនៅឋាន សម្លាប់ មនុស្ស ១៨នាក់ និងបង្កជាអគ្គិភ័យ។​ រដ្ឋបាលយោធាក្រុងនិយាយថា ក្រោយមកយន្តហោះដ្រូនរុស្ស៉ីបានវាយប្រហារចំផ្ទះ និងសម្លាប់មនុស្សម្នាក់។

ក្រសួងការពារជាតិរុស្ស៉ី បានលេីកឡេីងថា ការវាយប្រហារដែលកំណត់គោលដៅជាក់លាក់ ធ្វេីឡេីងទៅលេីការប្រមូលផ្តុំនៃមេបញ្ជាការអង្គភាព និងគ្រូបបង្គោលបរទេស នៅឯភោជនីយដ្ឋានមួយកន្លែង។ ជាលទ្ធផលនៃការវាយប្រហារធ្វើឱ្យខ្មាំងសត្រូវបាត់បង់កម្លាំងរហូតដល់ ៨៥នាក់ព្រមទាំរថយន្ត ២០គ្រឿង។

យោធាអ៊ុយក្រែន ចាត់ទុកសេចក្តីថ្លែងការណ៍របស់រុស្ស៉ីជាព័ត៌មានមិនពិត ។ តាមសាក្សីម្នាក់របស់ Reuters បុគ្គលិកជួយសង្គ្រោះបានប្រឹងប្រែងរំកិលរថយន្តដែលខូច ខណៈបង្អួចអគារខ្លះត្រូវបែកខ្ទេចខ្ទី ស្របពេលដែលអ្នកស្រុកកាន់សម្ភារៈផ្សេងៗនាំគ្នាជួសជុលផ្ទះរបស់ពួកគេ៕