(ក្រចេះ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ នៅថ្ងៃទី៨ ខែមេសា ឆ្នាំ២០២៥នេះ បានអញ្ជើញចូលរួមពិធីបុណ្យបូជាព្រះសព និងគម្រប់ ១០០ថ្ងៃ ព្រះរាមានុធម្ម ម៉ី យឺន ព្រះរាជាគណៈកិត្តិយស និងជាព្រះគ្រូវិសុទ្ធមេធា ព្រះអនុគណស្រុកស្នួល ព្រះចៅអធិការវត្តសទ្ធារង្សីខត្តិយារាម (វត្តផ្សារស្នួល) ឃុំស្នូួល ស្រុលស្នួល ខេត្តក្រចេះ ដែលបានទទួលអនិច្ចធម្ម នៅថ្ងៃទី៨ ខែមករា ឆ្នាំ២០២៥កន្លងទៅ ក្នុងព្រះជន្ម ៩១ព្រះវស្សា។
ពិធីនេះមានការចូលរួមពីសំណាក់លោក លី ផល្លា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្នួល, លោក ហួត ឃាងវេង រដ្ឋលេខាធិការក្រសួងព័ត៌មាន អនុប្រធានក្រុមការងារ និងថ្នាក់ដឹកនាំ អាជ្ញាធរដែនដីជាច្រើនរូបទៀត។
ពិធីបុណ្យបូជាព្រះសពនេះត្រូវបានយាងចូលរួមជាព្រះរាជធិបតិបតីរបស់សម្តេចព្រះពោធិ៍វ័ង្សកិត្តិបណ្ឌិត ណយ ច្រឹក សម្តេចសង្ឃនាយករងទី១ នៃព្រះរាជាណាចក្រកម្ពុជា និងដោយមានការនិមន្តចូលរួមពីព្រះមេគណខេត្ត ព្រះសង្ឃពុទ្ធបរិស័ទជាច្រើនអង្គនាក់។
ក្រោយពីអានជីវប្រវត្តិ និងវិយោគកថារបស់រួចមក, លោករដ្ឋមន្ត្រី នេត្រ ភក្ត្រា និងក្រុមការងារបានប្រទានភ្លើងថ្វាយសម្តេចព្រះពោធិ៍វ័ង្សកិត្តិបណ្ឌិត ណយ ច្រឹក សម្តេចសង្ឃនាយករងទី១ នៃព្រះរាជាណាចក្រកម្ពុជា ដើម្បីសម្តេចអម្ចាស់ភ្លើងបូជាព្រះសពព្រះរាមានុធម្ម ម៉ី យឺន អនុគណស្រុកស្នួលក្រោមបរិយាកាសប្រកបដោយសមានទុក្ខ៕
