(ភ្នំពេញ)៖ ធនាគារអភិវឌ្ឍន៍ជនបទ និងកសិកម្ម (ARDB) បានបង្កើតបណ្ណាល័យ និងមជ្ឈមណ្ឌលស្រាវជ្រាវ អគ្គបណ្ឌិតសភាចារ្យ អូន ព័ន្ធមុនីរ័ត្ន ក្នុងគោលបំណង លើកកម្ពស់ការស្រាវជ្រាវ និងអភិវឌ្ឍន៍ ប្រមូលផ្តុំ និងចងក្រងឯកសារទុកសម្រាប់កូនខ្មែរជំនាន់ក្រោយៗ បានសិក្សាស្វែងយល់អំពីបទពិសោធន៍របស់កូនខ្មែរជំនាន់មុន។
បើតាមលោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ARDB បានបញ្ជាក់ថា បណ្ណាល័យARDB, មជ្ឈមណ្ឌលស្រាវជ្រាវ អគ្គបណ្ឌិតសភាចារ្យ អូន ព័ន្ធមុនីរ័ត្ន និង APRACA Center of Excellence នឹងសម្ពោធដាក់អោយប្រើប្រាស់នៅថ្ងៃទី១៨ ខែមេសា ឆ្នាំ២០២៥ ខាងមុខនេះ។
លោកបញ្ជាក់ថា ការបង្កើតបណ្ណាល័យ និងស្ថាប័នស្រាវជ្រាវទាំង២នេះ ក្នុងគោលបំណង លើកកម្ពស់ការស្រាវជ្រាវ និងអភិវឌ្ឍន៍ (R&D) ក៏ដូចជា ប្រមូលផ្តុំ និងចងក្រងឯកសារទុកសម្រាប់កូនខ្មែរជំនាន់ក្រោយៗ សិក្សាស្វែងយល់អំពីបទពិសោធន៍របស់កូនខ្មែរជំនាន់មុន។
លោកបន្ថែមថា «ជាទស្សន:ផ្ទាល់ខ្លួន ខ្ញុំសង្កេតឃើញថា ខ្មែរយើងហាក់ដូចជាបាត់ទម្លាប់កត់ត្រាឯកសារទុក ចាប់ពីក្រោយការដួលរលំសម័យអង្គរដ៏រុងរឿងមក រហូតដល់សម័យបារាំងចូលស្រុកឆ្នាំ១៨៦៣ បារាំងបានជួយកត់ត្រាឯកសារទុកអោយ ក្រៅអំពីការកត់ត្រាក្នុងស្ត្រាស្លឹករឹតបន្តិចបន្តួចប៉ុណ្ណោះ។ ជាមួយគ្នានេះ ខ្មែរយើងជួបគ្រោះមហន្តរាយបត់បង់ឯកសារ ២លើកធំៗ គឺ(១) សម័យលង្វែក-ប្រាក់ដួង និង(២) សម័យប៉ុលពតដ៏ខ្មៅងងឹត ដែលពួកគេកម្ទេចទាំងឯកសារមានជីវិត (គ្រូបង្រៀន គ្រូពេទ្យ វិស្វករ..) និងឯកសារផ្សេងៗ ជាពិសេស ច្បាប់ បញ្ញត្តិ វប្បធម៌ខ្មែរ សាសនា...។ ខ្ញុំសូមអំពាវនាវ ដល់បងប្អូនខ្មែរ ចូលរួមស្រាវជ្រាវ ចងក្រងឯកសារទុកអោយបានសម្បូណ៌បែប សម្រាប់អ្នកជំនាន់ក្រោយយើង អភិវឌ្ឍខ្លួន និងជាតិ អោយថ្កុំថ្កើងរុងរឿងតរៀងទៅហ្នង។
បើតាមបណ្ឌិត កៅ ថាច បណ្ណាល័យ ARDB នឹងបើកឱ្យប្រើប្រាស់ជាសាធារណ: ជាពិសេសប្អូននិស្សិត អាចមកចូលអាន និងស្រាវជ្រាវផ្ទាល់ គ្រប់ពេល ដោយមានភ្ជាប់ប្រព័ន្ធអ៉ីនធើណែតល្បឿនលឿន។
ជាមួយគ្នានេះ លោកអគ្គនាយក បានអំពាវដល់សប្បុរសជន មេត្តាផ្តល់ជូនជាសៀវភៅ និងឯកសារស្រាវជ្រាវផ្សេងៗ មកតម្តល់ទុកជាប្រយោជន៍សាធារណ:នៅបណ្ណាល័យ ARDB។
បណ្ណាល័យ ARDB មានទីតាំងស្ថិតនៅអគារលេខ១៦៨ ផ្លូវបេតុងលេខ៧ ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ៕
