(ប៉ៃលិន)៖ លោកស្រីបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានកោតសរសើរ និងថ្លែងអំណរគុណអ្នកស្ម័គ្រចិត្ត និងបងប្អូនជាបុគ្គលិកសម្អាតអនាម័យ ដែលបានជួយសម្អាតអនាម័យបរិស្ថាន ក្នុងព្រឹត្តិការណ៍សង្ក្រាន្តប៉ៃលិន បុណ្យចូលឆ្នាំថ្មីប្រពៃណីជាតិខ្មែរ ម្សាញ់ សប្តស័ក ព.ស. ២៥៦៨ គ.ស ២០២៥ ដែលបានប្រព្រឹត្តទៅអស់រយៈពេល ៣ថ្ងៃ បានយ៉ាងល្អប្រសើរ ដោយមិនមានសំរាមពាសវាលពាសកាលឡើយ។
លោកស្រីបណ្ឌិតអភិបាលខេត្តប៉ៃលិន បានថ្លែងបែបនេះ ក្នុងឱកាសអញ្ជើញសំណេះសំណាល និងផ្តល់គ្រឿងឧបភោគបរិភោគ ភេសជ្ជៈ ថវិកាឧបត្ថម្ភដល់បងប្អូនអ្នកស្ម័គ្រចិត្ត ក្រុង-ស្រុក និងឃុំ/សង្កាត់ និងបុគ្គលិកសម្អាតអនាម័យ ដែលបានចូលរួមសម្អាតអនាម័យបរិស្ថាន ក្នុងព្រឹត្តិការណ៍សង្ក្រាន្តប៉ៃលិន ២០២៥ នាព្រឹកថ្ងៃទី១៨ ខែមេសា ឆ្នាំ២០២៥ នៅមាត់ស្ទឹងប៉ៃលិន ជាទីតាំងរៀបចំសង្ក្រាន្តប៉ៃលិន។
លោកស្រីបណ្ឌិត បាន ស្រីមុំ បានបញ្ជាក់ថា ក្នុងរយៈពេល០៣ថ្ងៃ នៃព្រឹត្តិការណ៍ក្នុងព្រឹត្តិការណ៍សង្ក្រាន្តប៉ៃលិន២០២៥ បងប្អូនអ្នកស្ម័គ្រចិត្ត និងបុគ្គលិកសម្អាតអនាម័យ បានដើរតួនាទីយ៉ាងសំខាន់ ក្នុងការធ្វើឱ្យសង្ក្រាន្តប៉ៃលិន មានសោភ័ណភាពស្អាត លើកកម្ពស់អនាម័យបរិស្ថាន មិនមានសំរាមពាសវាលពាសកាល ដែលនេះសបញ្ជាក់ឱ្យឃើញថា ការយកចិត្តទុកដាក់របស់បងប្អូន ក្នុងការសម្អាតនូវអនាម័យបរិស្ថានបានយ៉ាងល្អប្រសើរ ពិសេសទាំងមុនពេល និងក្រោយពេលសង្ក្រាន្ត នៅមាត់ស្ទឹងប៉ៃលិន និងកន្លែងផ្សេងៗទៀត គឺមិនមានសំរាមពាសវាលពាសកាលឡើយ។
លោកស្រីបណ្ឌិតអភិបាលខេត្ត បានបន្ថែមថា ក្រៅពីការយកចិត្តទុកដាក់ ទាំងកម្លាំងកាយ និងកម្លាំងចិត្ត របស់បងប្អូនអ្នកស្ម័គ្រចិត្ត និងបុគ្គលិកសម្អាតអនាម័យយើង ជាពិសេសបងប្អូនប្រជាពលរដ្ឋ ដែលមកកម្សាន្តសប្បាយ ក្នុងពិធីសង្ក្រាន្តប៉ៃលិន បានយកចិត្តទុកដាក់ក្នុងការវេចភ្ជាប់ និងទុកដាក់សំរាម ប្រកបដោយការទទួលខុសត្រូវរៀងៗខ្លួន ដែលធ្វើឱ្យព្រឹត្តិការណ៍សង្ក្រាន្តប៉ៃលិនឆ្នាំនេះ មានសោភ័ណភាពស្អាត និងបង្កភាពសប្បាយរីករាយ ព្រមទាំងផ្ដាំផ្ញើដល់បងប្អូនយើង ដែលបានចូលរួមសម្អាតអនាម័យបរិស្ថាន សូមបន្តចែករំលែកនូវបទពិសោធន៍ ការទុកដាក់សំរាម វេចខ្ចប់សំរាម ជូនដល់បងប្អូនប្រជាពលរដ្ឋ ដើម្បីរួមគ្នាធ្វើឱ្យខេត្តប៉ៃលិនយើងទាំងមូល គ្មានសំរាមរាយប៉ាយ៕
