(កោះកុង)៖ ពលរដ្ឋខេត្តកោះកុងពីរនាក់ប្តី-ប្រពន្ធ បានស្លាប់បាត់បង់ជីវិតព្រោះដើមសំរងដែលពួកគេកាប់រើសផ្លែនោះ ដួលរលំសង្កត់ពីលើ។
លោកវរៈសេនីយ៍ទោ យួត ហេងប៊ុនម៉ា អធិការនគរបាលស្រុកបូទុមសាគរ បានឱ្យដឹងថា នៅយប់ថ្ងៃទី២២ ខែមេសា ឆ្នាំ២០២៥នេះថា ពលរដ្ឋពីរនាក់ប្តីប្រពន្ធដែលស្លាប់ដោយសារការកាប់ដើមសំរងយកផ្លែ បុរសជាប្តីមានឈ្មោះ ឪ រិទ្ធ អាយុ ៣៧ឆ្នាំ និងស្រ្តីជាប្រពន្ធមានឈ្មោះ យ៉ាន់ សំភស់ អាយុ ៤១ឆ្នាំ។ ប្តីប្រពន្ធដែលដើមសំរងដួលរលំសង្កត់បណ្តាលឱ្យស្លាប់នេះ មានលំនៅឋានក្នុងភូមិជីត្រេះ ឃុំអណ្ដូងទឹក ស្រុកបូទុមសាគរ។
លោកអធិការនគបាលស្រុកបូទុមសាគរ បន្តទៀតថា ពីរនាក់ប្តីប្រពន្ធខាងលើនេះ បានចេញពីផ្ទះចូលព្រៃទៅកាប់កាប់ដើមសំរងនៅចំណុចភ្នំកំពង់ប្លូ ស្ថិតនៅភូមិទួលពោធិ៍ ឃុំតានូន ស្រុកបូទុមសាគរ។ លុះដល់ពេលយប់មិនឃើញត្រឡប់មកផ្ទះវិញ សាច់ញាតិក្រុមគ្រួសារ ក៏បានហៅទូរស័ព្ធចូលតែគ្មានអ្នកលើ។
លុះដល់ថ្ងៃទី២១ ខែមេសា ឆ្នាំ២០២៥ ក្រុមគ្រួសារបានដើររកនៅចំណុចខាងលើរកមិនឃើញមនុស្ស ឃើញតែម៉ូតូ។ បន្ទាប់មកទៀតនៅថ្ងៃទី២២ ខែមេសា ឆ្នាំ២០២៥ វេលាម៉ោង ១០៖៤៥នាទី ក្រុមគ្រួសារបានដើររកនៅចំណុចដដែលម្ដងទៀត ក៏បានឃើញជនរងគ្រោះទាំងពីរនាក់ ត្រូវដើមសំរងបាក់សង្កត់ស្លាប់នៅកន្លែងកើតហេតុទើបរាយការណ៍មកអាជ្ញាធរ ភូមិឃុំចុះទៅដល់កន្លែងកើតហេតុ។
សមត្ថកិច្ចជំនាញ បានសន្និដ្ឋានថា ជនរងគ្រោះទាំងពីរនាក់ប្តីប្រពន្ធបានស្លាប់ អំឡុងពេលកំពុងរើសផ្លែសំរងក្រោមដើម ដែលពួកគាត់បានកាប់ទុកចោលមួយដើមទៀត ដោយវាបាក់ជាប់វល្លិ៍ឈើ។ ស្រាប់ពេលកំពុងរើសដើមសំរង ដើមដែលកាប់ទុកចោលនោះ ដួលរលំសង្កត់ទាំងពីរនាក់ប្តីប្រពន្ធតែម្តង។
ក្រោយពិនិត្យសាកសពរួច កម្លាំងជំនាញអធិការដ្ឋាន គ្រូពេទ្យមណ្ឌលសុខភាពអណ្ដូងទឹក និងអាជ្ញាធរភូមិ-ឃុំ បានប្រគល់សាកសពទាំងពីរនាក់ប្រពន្ធប្រគល់ជូនគ្រួសារយកទៅធ្វើបុណ្យតាមប្រពៃណី។
របាយការណ៍របស់សមត្ថកិច្ច បង្ហាញថា នៅឆ្នាំ២០២៥នេះ ក្នុងខេត្តកោះកុង មានករណីកាប់ដើមសំរងហើយបណ្តាលឱ្យបាក់សង្កត់លើមនុស្សចំនួន៣ករណី ស្លាប់មនុស្ស៤នាក់ និងរបួស២នាក់
ប្រជាពលរដ្ឋដែលអាស្រ័យផលពីអនុផលព្រៃឈើ តែងនាំគ្នារើសផ្លែសំរងទៅលក់ត្បិតមានតម្លៃខ្ពស់គួរសម។ ដោយសារតែដើមសំរងខ្ពស់ៗមានពលរដ្ឋខ្លះជ្រើសយកវិធីកាប់រំលំដើមសំរងដើម្បីប្រមូលយកផ្លែ។
កន្លងទៅក្រសួងបរិស្ថាន តែងបានអំពាវនាវដល់អ្នករកផ្លែសំរងទៅលក់នោះ កុំជ្រើសយកវិធីកាប់រំលំដើមសំរងដើម្បីប្រមូលផល ព្រោះធ្វើឱ្យដើមសំរងប្រឈមនឹងការផុតរលត់ពីក្នុងព្រៃរបស់កម្ពុជា។ ដើម្បីទប់ស្កាត់នូវសកម្មភាពនេះ ក្រសួង ក៏បានធ្វើសកម្មភាពផ្សព្វផ្សាយដល់ប្រជាពលរដ្ឋនៅតាមតំបន់ដែលមានដើមសំរងផងដែរ។
បើទោះបីជាយ៉ាងណា លោក អ៊ាង សុផល្លែត រដ្ឋមន្ត្រីក្រសួងបរិស្ថានសម្តែងនូវការសោកស្តាយចំពោះហេតុការណ៍អកុសលខាងលើ ព្រមទាំងចូលរួមរំលែកមរណទុក្ខជាមួយក្រុមគ្រួសារសាច់ញាតិជនរងគ្រោះផងដែរ។ លោករដ្ឋមន្ត្រីក្រសួងបរិស្ថាន បន្តអំពាវនាវដល់ប្រជាពលរដ្ឋឱ្យបញ្ឈប់ការកាប់រំលំដើមសំរងប្រមូលផ្លែ ព្រោះធ្វើឱ្យដើមសំរងផុត ហើយប្រឈមគ្រោះថ្នាក់ដូចករណីខាងលើនេះ៕
