(ព្រះវិហារ)៖ លោក គីម រិទ្ធី អភិបាលខេត្តព្រះវិហារ បានលើកឡើងថា ការបរិច្ចាគឈាមជាទង្វើដ៏មានតម្លៃដែល បង្ហាញពីស្មារតីសាមគ្គីភាព និងការយកចិត្តទុកដាក់ចំពោះសង្គមជាតិ។ លោកថា «ឈាមដែលបានបរិច្ចាគ នឹងត្រូវប្រើប្រាស់សម្រាប់ការវះកាត់ ព្យាបាលជំងឺធ្ងន់ធ្ងរ និងសង្គ្រោះជីវិតអ្នកជំងឺ ដូចជា ជំងឺមហារីក ជំងឺឈាម អ្នកជំងឺដែលរងរបួសធ្ងន់ និងស្ត្រីឆ្លងទន្លេជាដើម»។
ការថ្លែងលើកឡើងបែបនេះរបស់លោក គីម រិទ្ធី ក្នុងឱកាសដែលលោកអញ្ជើញដឹកនាំមន្ត្រីរាជការ ចំណុះរដ្ឋបាលខេត្តព្រះវិហារ មន្ទីរ អង្គភាព ជុំវិញខេត្ត អាជ្ញាធរក្រុង ស្រុកទាំង៨ ព្រមទាំងកងកម្លាំងប្រដាប់អាវុធទាំង៣ ចូលរួមបរិច្ចាគឈាមដោយស្ម័គ្រចិត្ត ក្រោមប្រធានបទ «ផ្តល់ឈាម ផ្តល់សេចក្តីស្រឡាញ់» ដែលបានរៀបចំធ្វើឡើងនាព្រឹកថ្ងៃទី៥ ខែឧសភា ឆ្នាំ២០២៥ នៅសាលប្រជុំប្រាសាទព្រះវិហារ នៃអគាររដ្ឋបាលសាលាខេត្តជាន់ទី៣។
សូមបញ្ជាក់ថា ពិធីបរិច្ចាគឈាមដោយស្ម័ក្រចិត្តក្រោមប្រធានបទ «ផ្តល់ឈាម ផ្តល់ក្តីស្រលាញ់» នាពេលនេះ គឺរដ្ឋបាលខេត្តព្រះវិហារ សហការជាមួយសហភាពសហព័ន្ធយុវជនកម្ពុជាខេត្ត ក្នុងគោលបំណងដើម្បីរួមចំណែកក្នុងការ ផ្គត់ផ្គង់ឈាមជូនដល់មន្ទីរពេទ្យបង្អែក ១៦ មករា ខេត្តព្រះវិហារ ដើម្បីជួយសង្គ្រោះអាយុជីវិតបងប្អូនប្រជាពលរដ្ឋ ដែលរងគ្រោះដោយឧបទ្ទវហេតុផ្សេងៗ ក៏ដូចជាអ្នកជំងឺដែលត្រូវការឈាមជាចាំបាច់ក្នុងការព្យាបាល។
នៅក្នុងឱកាសនោះ អភិបាលខេត្តព្រះវិហារ បានថ្លែងថា «ក្លឹបនៃក្តីស្រឡាញ់» បានរួមចំណែកយ៉ាងសំខាន់ក្នុងការជំរុញយុវជន និងប្រជាពលរដ្ឋគ្រប់ស្រទាប់វណ្ណៈ ឱ្យចូលរួមគាំទ្រគោលដៅបរិច្ចាគឈាមដោយស្ម័គ្រចិត្ត១០០% របស់មជ្ឈមណ្ឌលជាតិផ្តល់ឈាម សកម្មភាពនេះមិនត្រឹមតែលើកកម្ពស់វប្បធម៌បរិច្ចាគឈាមដោយស្ម័គ្រចិត្ត និងមិនគិតកម្រៃប៉ុណ្ណោះទេ ថែមទាំងពង្រឹងនូវសុវត្ថិភាព និងនិរន្តរភាពឈាម សម្រាប់សង្គ្រោះជីវិតមនុស្សផងដែរ។
អភិបាលខេត្តព្រះវិហារ បានបញ្ជាក់ថា «ក្លឹបនៃក្តីស្រឡាញ់» ប្តេជ្ញាបន្តរៀបចំកម្មវិធីបរិច្ចាគឈាមជាប្រចាំ ដើម្បីបំពេញតម្រូវការឈាមនៅក្នុងមន្ទីរពេទ្យ។ សូមបញ្ជាក់ថា កម្មវិធីផ្តល់ឈាមដោយស្ម័គ្រចិត្តនាពេលនេះ មានអ្នកចូលរួម សរុបចំនួន២០០នាក់ ក្នុងនោះអ្នកស្ម័គ្រចិត្តបរិច្ចាគឈាមមានចំនួន១៤១នាក់ ស្រី៣៥នាក់។
អ្នកមិនមានលក្ខខណ្ឌគ្រប់គ្រាន់ក្នុងការបរិច្ចាគមានចំនួន៣៦នាក់ ស្រី២៦នាក់ ឈាមដែលប្រមូលបានមានចំនួន ៨៤សាក់ ដែលមានក្រុមឈាមO+ ចំនួន២៦ សាក់, AB+ ចំនួន ៦សាក់, A+ ចំនួន ១៦សាក់ និង B+ ចំនួន ៣៦សាក់៕
