(កំពង់ស្ពឹ)៖ លោកបណ្ឌិត កែរ រដ្ឋា អនុប្រធានក្រុមការងារថ្នាក់កណ្តាលចុះមូលដ្ឋានស្រុកឱរ៉ាល់ និងជាប្រធានក្រុមការងារចុះមូលដ្ឋានឃុំហោងសំណំ នៅថ្ងៃទី១៨ ខែឧសភា ឆ្នាំ២០២៥ បានចុះពិនិត្យមើលការចុះឈ្មោះបោះឆ្នោត និងការធ្វើបច្ចុប្បន្នភាពជីវមាត្រ នៅឃុំហោងសំណំ ស្រុកឱរ៉ាល់ ខេត្ដកំពង់ស្ពឺ។
ក្នុងឱកាសនោះ លោកបណ្ឌិត កែរ រដ្ឋា បានឧបត្ថម្ភថវិកាដល់ក្រុមការងារចុះឈ្មោះ និងក្រុមប្រឹក្សាឃុំ ៦នាក់ក្នុងម្នាក់ៗ ៥០,០០០រៀល។
បន្ទាប់មកលោកបណ្ឌិត កែរ រដ្ឋា រដ្ឋលេខាធិការក្រសួងសុខាភិបាល ជាសមាជិកគណៈកម្មាធិការកណ្ដាលសហភាពសហព័ន្ធយុវជនកម្ពុជា ជាអនុប្រធានប្រតិបត្តិ ទទួលបន្ទុកជនបង្គោលផ្សព្វផ្សាយ និងទំនាក់ទំនងសាធារណៈរបស់ក្រុមការងារគ្រូពេទ្យស្ម័គ្រចិត្តឯកឧត្ដម ហ៊ុន ម៉ានី ២៨សាខារាជធានី/ខេត្ត និងសាកលវិទ្យាល័យ និងជាប្រធានក្រុមការងារចុះមូលដ្ឋានឃុំហោងសំណំ បានរៀបចំក្រុមការងារគ្រូពេទ្យស្ម័គ្រចិត្តឯកឧត្ដម ហ៊ុន ម៉ានី មួយក្រុម ចុះអប់រំផ្សព្វផ្សាយ ព្រមទាំងពិនិត្យ ព្យាបាលជំងឺ និងចែកថ្នាំពេទ្យជូនប្រជាពលរដ្ឋក្រីក្រចាស់ជរាតាមខ្នងផ្ទះ បានចំនួន៣៤នាក់ ស្រី២១នាក់ ដែលជាអំណោយដ៏ថ្លៃថ្លារបស់លោកឧបនាយករដ្ឋមន្ត្រី ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី នៅបរិវេណសាលាឃុំហោងសំណំ ស្រុកឱរ៉ាល់ ខេត្តកំពង់ស្ពឺ។
លោកបណ្ឌិត កែរ រដ្ឋា បានជម្រាបជូនថា កម្មវិធីនេះមានការអប់រំផ្សព្វផ្សាយពីជំងឺឆ្លង ជំងឺមិនឆ្លង រស់នៅប្រកបដោយអនាម័យ ហូបទឹកឆ្អឹន អាហារឆ្អិន តិចអំបិល តិចស្ករ តិចខ្លាញ់។
លោកបណ្ឌិតបានថ្លែងថា ក្រុមការងារគ្រូពេទ្យស្ម័គ្រចិត្ត ឯកឧត្តមហ៊ុន ម៉ានី បានចុះពិនិត្យ និងព្យាបាលជំងឺជូនប្រជាពលរដ្ឋ គឺជាស្មារតីមនុស្សធម៌សុទ្ធសាធ ដែលស្តែងចេញពីសេចក្តីស្រឡាញ់បងប្អូនប្រជាពលរដ្ឋ ក្នុងនាមជាឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្ររបស់ប្រជាពលរដ្ឋ និងបង្កើនភាពសុខដុមរមនាក្នុងសហគមន៍ តាមរយៈការផ្ដល់សេវាសុខភាព សាធារណៈដោយឥតគិតថ្លៃ ជាពិសេសគឺការគិតគូរដល់ចាស់ជរា ចាស់ព្រឹទ្ធាចារ្យ ស្របតាមការចង្អុលបង្ហាញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ថ្លែងក្នុងទិវាជាតិ និងអន្តរជាតិមនុស្សចាស់ កាលពីថ្ងៃទី១ ខែតុលា ឆ្នាំ២០២៤ កន្លងទៅ។
ទន្ទឹមនឹងនេះ លោកបណ្ឌិត បាននាំពាក្យផ្តាំផ្ញើសួរសុខទុក្ខពី លោកឧបនាយករដ្ឋមន្ត្រី ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ជូនចំពោះ អ៊ុំ ពូមីងប្រជាពលរដ្ឋដែលបានចូលរួមក្នុងកម្មវិធីព្យាបាលនេះផងដែរ។
ក្នុងឱកាសនេះដែរ លោកបណ្ឌិត កែរ រដ្ឋា បានផ្ដល់នូវថ្នាំពេទ្យសម្រាប់ព្យាបាលចំនួន៥ថ្ងៃទៅ១០ និងឃីតមួយកញ្ចប់ ក្នុងនោះមានគ្រឿងឧបភោគបរិភោគ និងភេសជ្ជៈមួយចំនួនផងដែរ៕
