(ភ្នំពេញ)៖ ដោយមើលឃើញការរីករាលដាលនៃការចែកចាយ និងការប្រើប្រាស់បារីអេឡិចត្រូនិកនាពេលបច្ចុប្បន្ន ជាពិសេសទៅលើសិស្សានុសិស្ស ដែលកំពុងស្ថិតនៅក្នុងវ័យសិក្សានោះ អង្គការចលនាដើម្បីសុខភាពកម្ពុជា (CMH) នាថ្ងៃទី២៧ ខែឧសភា ឆ្នាំ២០២៥នេះ បានចុះផ្សព្វផ្សាយពីផលប៉ះពាល់ និងគ្រោះថ្នាក់នៃការប្រើប្រាស់បារីអេឡិចត្រូនិក និងមូលហេតុដែលនាំឱ្យឈានដល់ការប្រើប្រាស់បារីនេះ ដល់សិស្សានុសិស្សនៃអង្គការ ដើម្បីភាពញញឹមនៃកុមារ (PSE) ប្រមាណជិត ៣០០នាក់។
ចុះផ្សព្វផ្សាយពីគ្រោះថ្នាក់នៃការប្រើប្រាស់បារីអេឡិចត្រូនិក របស់អង្គការចលនាដើម្បីសុខភាពកម្ពុជា ដល់សិស្សានុសិស្សនៃអង្គការ PSE នេះ ក៏ស្របទៅទិវាពិភពលោកគ្មានថ្នាំជក់ឆ្នាំ២០២៥ នាថ្ងៃទី៣១ ខែឧសភា ឆ្នាំ២០២៥ខាងក្រោមនេះ ក្រោមប្រធានបទ «ការលាតត្រដាងល្បិចកលបិទបាំងការពិតនៃផលិតផលថ្នាំជក់ និងផលិតផលនីកូទីន»។
លោក សុង ឌឿរ៉ាក់ តំណាងលោកវេជ្ជ មុំ គង់ យកប្រតិបត្តិអង្គការចលនាដើម្បីសុខភាពកម្ពុជា (CMH) បានបញ្ជាក់ថា បច្ចុប្បន្ននេះគេសង្កេតឃើញថា មានការផ្សព្វផ្សាយលក់បារីអេឡិចត្រូនិក តាមតាមប្រព័ន្ធអនឡាញជាច្រើនមានដូចជា Facebook ,Tik Tok, Telegram ជាដើម ក្រោមរូបភាពមួយចំនួនដូចជា ការវេចខ្ចប់ផលិតផលឱ្យមានភាពទាក់ទាញជាងមុន ការផ្សាយលក់ផលិតផលនៅកន្លែង ដែលកុមារទៅញឹកញាប់ ការផ្សព្វផ្សាយដោយប្រើបំភ័នថាបារីរអេឡិចត្រូនិកជាម៉ាស៊ីនផ្ដាច់បារី មានក្លិនក្រអូប មិនប៉ះពាល់សុខភាពជាដើម។
លោក សុង ឌៀរ៉ាក់ បានបន្ថែមថា ឧស្សាហកម្មថ្នាំជក់បានធ្វើយុទ្ធសាស្ត្រទីផ្សារបែបនេះ ដើម្បីទាក់ទាញអតិថិជនថ្មីៗ ជាពិសេសកុមារ និងយុវជនសម្រាប់ជំនួសអតិថិជនចាស់ៗដែលបានឈប់ប្រើប្រាស់ និងបានស្លាប់ដោយជំងឺដែលបង្កឡើងដោយថ្នាំជក់។ យោងទៅតាមការសិក្សាស្រាវជ្រាវរបស់ក្រសួងអប់រំយុវជន និងកីឡា បានបង្ហាញថា ប្រភពចម្បងនៃការចែកចាយនៃបារីអេឡិចត្រូនិកគឺ តាមប្រព័ន្ធអនឡាញ រួមមាន៖ Facebook ,Tik Tok, Telegram , Instagram និងYouTubeជាដើម (៨២%)។
តាមការបញ្ជាក់ពីសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ (SEATCA) បានបង្ហាញថា កុមារ និងយុវជនងាយនឹងទទួលរងផលប៉ះពាល់ ដែលបណ្តាលមកពីការឃោសនា ផ្សាយពាណិជ្ជកម្មថ្នាំជក់ ដែលធ្វើឱ្យពួកគេមានអាកប្បកិរិយាទោរទន់ ចង់ជក់បារីច្រើនឡើង ហើយគិតថាការប្រើប្រាស់ថ្នាំជក់ជារឿងធម្មតា មិនមានផលប៉ះពាល់អ្វីទាំងអស់។ ផ្ទុយទៅវិញ មានភស្តុតាងជាច្រើនបានបង្ហាញថាការប្រើប្រាស់បារីអេឡិចត្រូនិកបានបង្កផលប៉ះពាល់ដល់សុខភាពយ៉ាងធ្ងន់ធ្ងរ ដូចជា៖ ធ្វើឱ្យញៀន កើតជំងឺមហារីកសួត រលាកសួត ជំងឺផ្លូវដង្ហើម ជំងឺបេះដូង ប៉ះពាល់ដល់ការអភិវឌ្ឍខួរក្បាល និងអាចបាត់បងជីវិត។
ចំណែកឯអ្នកស្រូបចំហាយបារីអេឡិចត្រូនិក ដោយប្រយោលពីគេ ក៏អាចមានផលប៉ះពាល់ កើតជំងឺដូចអ្នកជក់ដែរ។ មិនតែប៉ុណ្ណោះ វាក៏ជាកត្តាជំរុញឱ្យ កុមារ និងយុវជនឈានទៅប្រើប្រាស់គ្រឿងញៀនខុសច្បាប់ផ្សេងៗ។
នាឱកាសនោះដែរសិស្សានុសិស្សនៃអង្គការដើម្បីភាពញញឹមនៃកុមារ (PSE) ក៏បានសម្តែងក្តីបារម្ភអំពីបញ្ហាបារីអេឡិចត្រូនិក កើតមានឡើងនៅក្នុងសាលាខ្លួន និងនៅក្នុងមូលដ្ឋានដែលខ្លួនរស់នៅ និងបានផ្តួចផ្តើមគំនិតសម្តែងរឿងអប់រំខ្លី ស្ដីពីផលប៉ះពាល់នៃបារីអេឡិចត្រូនិក និងមូលហេតុដែលនាំឱ្យកុមារ និងយុវជនចាប់ផ្ដើមប្រើប្រាស់បារីអេឡិចត្រូនិកផងដែរ។
សូមបញ្ជាក់ដែរថា យោងទៅតាមអង្គការសុខភាពពិភពលោក បានលើកឡើងថា ទិវាពិភពលោកគ្មានថ្នាំជក់ឆ្នាំ២០២៥ ផ្តោតលើការចូលរួមផ្សព្វផ្សាយឱ្យទូលំទូលាយដល់សាធារណជនទូរទៅឱ្យយល់ដឹង អំពីល្បិចកលរបស់ឧស្សាហករថ្នាំជក់ ដែលព្យាយាមបិទបាំងពីគ្រោះថ្នាក់នៃផលិតផលរបស់ខ្លួន តាមរយៈការផលិតបារីអេឡិចត្រូនិក ដូចទៅនឹងភេសជ្ជៈ ទឹកដោះគោ ស្ករគ្រាប់ តុក្កតា និងរបស់ប្រើប្រាស់ដែលទាក់ទាញផ្សេងៗ ហើយបានបន្ថែមសារធាតុផ្តល់រសជាតិ ផ្តល់ក្លិន និងសារធាតុនីកូទីននៅក្នុងបារីអេឡិចត្រូនិក ដែលធ្វើឱ្យអ្នកប្រើប្រាស់ញៀនពិបាកក្នុងការផ្តាច់។
តាមរយៈការលាតត្រដាងយុទ្ធសាស្ត្រទាំងនេះ នឹងជួយបំភ្លឺដល់ប្រជាជនទូទៅឱ្យបានដឹងអំពីគ្រោះថ្នាក់នៃផលិតផលទាំងនេះ និងអាចចូលរួមកាត់បន្ថយផលប៉ះពាល់សុខភាពនិងបង្ការអ្នកស្លាប់ដោយសារការប្រើប្រាស់បារីអេឡិចត្រូនិក៕
