(កំពង់ធំ)៖ នៅថ្ងៃចន្ទ ១៤កើត ខែជេស្ឋ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី៩ ខែមិថុនា ឆ្នាំ២០២៥ ក្រុមការងាររាជរដ្ឋាភិបាលចុះមូលដ្ឋានឃុំទ្រៀល ស្រុកតាំងគោក ខេត្តកំពង់ធំ បានប្រារព្ធពិធី «វេទិកាសាធារណៈ» នៅវត្តក្តីតាចិន្ត ស្ថិតក្នុងភូមិក្តីតាចិន្ត ឃុំទ្រៀល ស្រុកតាំងគោក ខេត្តកំពង់ធំ ក្រោមអធិបតីភាព លោក ប៉ិច សុខា អនុរដ្ឋលេខាធិការទីស្ដីការគណៈរដ្ឋមន្ត្រី អគ្គលេខាធិការក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំទ្រៀល ដោយមានការចូលរួមពីក្រុមការងាររាជរដ្ឋាភិបាលចុះមូលដ្ឋានស្រុកតាំងគោក ឃុំទ្រៀល អភិបាលរងនៃគណៈអភិបាលស្រុកតាំងគោក តំណាងមន្ទីរជំនាញចំណុះរដ្ឋបាលខេត្តកំពង់ធំ តំណាងការិយាល័យស្ថិតក្នុងរចនាសម្ព័ន្ធរដ្ឋបាលស្រុក សមាជិកក្រុមប្រឹក្សាឃុំ ថ្នាក់ដឹកនាំភូមិ យុវជន ប៉ុស្តិ៍នគរបាល គ្រូបង្រៀន និងមន្ត្រីរដ្ឋបាលឃុំ ប្រជាពលរដ្ឋក្នុងមូលដ្ឋានឃុំទ្រៀលចំនួនសរុប ៣១៨នាក់ ស្រី១០៥នាក់។
លោក ប៉ិច សុខា បានជម្រាបអង្គពិធីថា ក្រុមការងាររាជរដ្ឋាភិបាលចុះមូលដ្ឋាន គឺត្រូវបានផ្ដួចផ្ដើមដ៏ខ្ពង់ខ្ពស់ប្រកបដោយភាពឈ្លាសវៃ និងចក្ខុវិស័យវែងឆ្ងាយ របស់សម្ដេចតេជោ ហ៊ុន សែន អតីតនាយករដ្ឋមន្ត្រី និងបន្ដគាំទ្រអនុវត្ដប្រកបដោយឆន្ទៈខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការបង្កើតយន្ដការដ៏មុតស្រួចរបស់ រាជរដ្ឋាភិបាលអនុញ្ញាតឱ្យមន្ត្រីថ្នាក់ជាតិមានឱកាសបន្ថែមទៀតក្នុងការចូលរួមជួយអភិវឌ្ឍនៅមូលដ្ឋាននានាទូទាំងប្រទេស តាមរយៈការសហការការងារជាមួយមន្ត្រី ក៏ដូចជាអាជ្ញាធរថ្នាក់ក្រោមជាតិ ដើម្បីចុះជួយតម្រង់ទិស, គាំទ្រ, លើកកម្ពស់, កែលម្អ និងជំរុញការផ្សារភ្ជាប់រវាងការអនុវត្ដយុទ្ធសាស្រ្ដ និងផែនការអភិវឌ្ឍន៍របស់ថ្នាក់ក្រោមជាតិតាមភូមិ ឃុំ និងស្រុក ទៅនឹងរបៀបវារៈនៃការអភិវឌ្ឍគោលនយោបាយ និងយុទ្ធសាស្រ្ដថ្នាក់ជាតិ ដើម្បីបន្ដលើកស្ទួយសុខុមាលភាពប្រជាពលរដ្ឋ, ការធ្វើឱ្យប្រសើរឡើងនូវសេវាសាធារណៈ, ការបន្ដពង្រីកហេដ្ឋារចនាសម្ព័ន្ធគន្លឹះ និងការធានាឱ្យបានសណ្ដាប់ ធ្នាប់ សុខសន្ដិភាព និងសុវត្ថិភាព ព្រមទាំងការជួយដោះស្រាយទំនាស់ និងបញ្ហាប្រឈមផ្សេងៗ ដែលបានកើតឡើងនៅមូលដ្ឋានផ្ទាល់។
ការរៀបចំវេទិកាសាធារណៈនាថ្ងៃនេះ គឺជាឱកាសដ៏ល្អមួយក្នុងការបង្កើនភាពស្និទស្នាល ការយល់ពីគ្នាទៅវិញទៅមករវាងរាជរដ្ឋាភិបាល ជាមួយប្រជាពលរដ្ឋ និងជាពេលវេលាដ៏សំខាន់មួយដែលអាចធ្វើឱ្យក្រុមការងាររាជរដ្ឋាភិបាលចុះមូលដ្ឋានឃុំទ្រៀល ស្រុកតាំងគោក បានទទួលដោយផ្ទាល់នូវរាល់កង្វល់ សំណើ សំណូមពរ និងបញ្ហាប្រឈម ព្រមទាំងមតិយោបល់ ការទិទៀនកែលម្អនានា ក្នុងគោលដៅស្ថាបនាដល់គ្រប់អង្គភាពដែលស្ថិតក្រោមចំណុះរដ្ឋបាលឃុំទ្រៀល ដើម្បីពង្រឹងការអនុវត្តការផ្តល់សេវាសាធារណៈឱ្យបានល្អ ទាន់ពេលវេលា កាត់បន្ថយភាពមិនប្រក្រតី អំពើពុករលួយ ចំណុចអសកម្ម ដើម្បីបង្កើននូវការជឿទុកចិត្តពីសំណាក់ប្រជាពលរដ្ឋ ដើម្បីឆ្លើយតបទៅនឹងតម្រូវការជាក់ស្តែងនៅក្នុងដែនសមត្ថកិច្ចរបស់ខ្លួន ស្របតាមឆន្ទៈ និងការបេ្តជ្ញាចិត្តរបស់រាជរដ្ឋាភិបាលកម្ពុជាក្នុងការលើកកម្ពស់សុខសុវត្ថិភាព សុខុមាលភាព សេវាសាធារណៈ និងការទប់ស្កាត់ នូវគ្រោះមហន្តរាយនានានៅក្នុងមូលដ្ឋាន។
លោក ប៉ិច សុខា បានបញ្ជាក់អំពីគោលបំណងសំខាន់នៃការរៀនចំវេទិកាសាធារណៈថ្ងៃនេះ មានៗចំនួន៣ដូចខាងក្រោម៖
១៖ លើកកម្ពស់ការផ្សារភ្ជាប់ទំនាក់ទំនងរវាងរដ្ឋាភិបាល និងប្រជាពលរដ្ឋទាំងអស់បន្ថែមទៀត តាមរយៈការជួបប្រាស្រ័យទាក់ទងផ្ទាល់ជាមួយប្រជាពលរដ្ឋនៅតាមមូលដ្ឋាន ដើម្បីសាកសួរសុខទុក្ខ និងស្វែងយល់បន្ថែមអំពីជីវភាពរស់នៅជាក់ស្ដែង និងអាចឱ្យក្រុមការងារស្ដាប់នូវទុក្ខកង្វល់ សំណើ សំណូមពរ និងបញ្ហាប្រឈមនានារបស់ពុកម៉ែបងប្អូននៅតាមមូលដ្ឋានឃុំទ្រៀល។
២៖ បន្តផ្សព្វផ្សាយអំពីកម្មវិធីនយោបាយ ផែនការ និងយុទ្ធសាស្ត្របញ្ចកោណដំណាក់កាលទី១ ព្រមទាំងសមិទ្ធផលនានារបស់រដ្ឋាភិបាលជូនប្រជាពលរដ្ឋជ្រាប និងស្វែងរកការគាំទ្រនិងការចូលរួមអនុវត្ត។
៣៖ បន្តជួយពិនិត្យសំណើ សំណូមពរ និងបញ្ហាប្រឈមនានានៅក្នុងមូលដ្ឋានឃុំទ្រៀល ដើម្បីកំណត់វិធានការ និងជំរុញការដោះស្រាយទៅតាមតម្រូវការ និងសភាពការណ៍ជាក់ស្ដែងរបស់ប្រជាពលរដ្ឋ តាមដែលអាចធ្វើបាន។
លោក ប៉ិច សុខា បានសង្កត់ធ្ងន់ថា សុខទុក្ខរបស់ប្រជាពលរដ្ឋជាកង្វល់របស់រាជរដ្ឋាភិបាលពីមួយអាណត្តិទៅមួយអាណត្តិ រាជរដ្ឋាភិបាលដាក់ចេញគោលនយោបាយ ដើម្បីដោះស្រាយបញ្ហារបស់ប្រជាពលរដ្ឋ។ ជាក់ស្តែងនៅក្នុងអាណត្តិទី៧នេះ រាជរដ្ឋាភិបាលកម្ពុជា បានអនុវត្តជាក់ស្តែងនូវគោលនយោបាយអាទិភាពគន្លឹះចំនួន៥ នៃយុទ្ធសាស្ត្របញ្ចកោណដំណាក់កាលទី១៖ មនុស្ស ផ្លូវ ទឹក ភ្លើង និងបច្ចេកវិទ្យា។ ទន្ទឹមនេះ ក្នុងគោលបំណងកសាងរដ្ឋបាលសាធារណៈប្រកបដោយសមត្ថភាព និងស្អាតស្អំ ក្នុងការបម្រើប្រជាពលរដ្ឋឱ្យបានកាន់តែល្អប្រសើរ កសាងមូលធនមនុស្សប្រកបដោយចំណេះដឹង ចំណេះធ្វើគុណធម៌ និងសុខភាពល្អមាំមួន ព្រមទាំងកសាងសង្គមមួយប្រកបដោយសន្តិសុខ សុវត្ថិភាព និងយុត្តិធម៌ រាជរដ្ឋាភិបាល បានដាក់ចេញនូវវិធានការគន្លឹះចំនួន៥ រួមមាន៖ ទី១) ការពង្រឹងសមត្ថភាពរដ្ឋបាលសាធារណៈ ទី២) ការលើកកម្ពស់គុណភាពអប់រំ ទី៣)ការលើកកម្ពស់គុណភាពសេវាសុខាភិបាល ទី៤) ការពង្រឹងការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» និងទី៥) ការពង្រឹង និងលើកកម្ពស់គុណភាព និងប្រសិទ្ធភាពនៃប្រព័ន្ធយុត្តិធម៌។
កម្មវិធីគោលនយោបាយអាទិភាពចំនួន៦ ចំណុចរបស់រាជរដ្ឋាភិបាលនៅក្នុងអាណត្តិទី៧នេះ មានគោលបំណងលើកស្ទួយជីវភាពរស់នៅរបស់ប្រជាពលរដ្ឋ ជាពិសេសគ្រួសារក្រីក្រ និងងាយរងគ្រោះគ្រួសារងាយរងហានិភ័យ យុវជន អ្នកប្រកបមុខរបរ និងធ្វើការងារក្នុងសេដ្ឋកិច្ចក្រៅប្រព័ន្ធ កសិករ មន្ត្រីរាជការ អតីតយុទ្ធជន និងមន្ត្រីចូលនិវត្តន៍ ដែលមានតម្រូវការចំាចាច់ក្នុងការទទួលបានសេវាគាំពារសង្គម ក៏ដូចជាថែទាំសុខភាព និងអប់រំរួមមាន៖
១) ការពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសាកល ពោលគឺនៅពេលមានជំងឺ មន្ត្រីរាជការស៊ីវិល កម្លាំងប្រដាប់អាវុធ និងប្រជាពលរដ្ឋ ជាពិសេសពលរដ្ឋក្រីក្រនិងងាយរងគ្រោះ ត្រូវទទួលបាននូវសេវាថែទាំសុខភាពគ្រប់ៗគ្នា។
២) យុវជនដែលជាកូនអ្នកក្រីក្រ និងងាយរងគ្រោះ នឹងទទួលបានការបណ្ដុះបណ្ដាលជំនាញវិជ្ជាជីវៈដើម្បីពួកគេអាចយកទៅប្រកបរបរចិញ្ចឹមជីវិតបានងាយស្រួល។ ការបណ្ដុះបណ្ដាលនេះធ្វើឡើងដោយឥតបង់ប្រាក់ ហើយថែមទាំងទទួលបានការឧបត្ថម្ភកំឡុងពេលបណ្ដុះបណ្ដាលបន្ថែមទៀត។
៣) ពលរដ្ឋក្រីក្រ និងងាយរងគ្រោះ នឹងទទួលបាននូវភាពកក់ក្តៅតាមរយៈកម្មវិធីជាតិជំនួយសង្គមដែលនឹងត្រូវពង្រឹងឱ្យទៅជាកម្មវិធីជាតិរឹងមាំមួយ ពោលគឺនៅពេលពលរដ្ឋជួបវិបត្តិ ឬហានិភ័យផ្សេងៗ កម្មវិធីជាតិជំនួយសង្គមនឹងរង់ចាំជួយពួកគេប្រកបដោយប្រសិទ្ធភាពខ្ពស់។
៤) អ្នកប្រកបរបរក្រៅប្រព័ន្ធនឹងទទួលបានការយកចិត្តទុកដាក់ ហើយក៏អាចទទួលបានអត្ថប្រយោជន៍ដូចអ្នកប្រកបរបរក្នុងប្រព័ន្ធដែរនៅពេលដែលពួកគេជួបវិបត្តិ ឬហានិភ័យផ្សេងៗ។
៥) ប្រជាកសិករនឹងទទួលបាននូវការគាំពារតាមរយៈការដាក់ចេញនូវយន្តការសម្របសម្រួល និងកម្មវិធីផ្ដល់ប្រាក់កម្ចីដើម្បីប្រកបមុខរបរកសិកម្ម ជាពិសេស គឺទទួលបាននូវការការពារតម្លៃកសិផលឱ្យបានសមរម្យ ដោយមិនឱ្យកសិករខាតបង់ឡើយ។
៦)រាជរដ្ឋាភិបាលបញ្ជូនមន្ត្រីបច្ចេកទេសកសិកម្មទៅជួយកសិករនៅគ្រប់ឃុំ-សង្កាត់ដែលមានពលរដ្ឋប្រកបរបរកសិកម្ម និងបង្កើតសហគមន៍កសិករនៅទូទាំងប្រទេស ដើម្បីការពារផលប្រយោជន៍របស់កសិករ។
ក្នុងវេទិកានោះ អង្គពិធីទាំងមូល បានប្រកាសគាំទ្រយ៉ាងពេញទំហឹងចំពោះចំណាត់ការដ៏ម៉ឺងម៉ាត់ប្រកបដោយចក្ខុវិស័យគិតគូរវែងឆ្ងាយ និងឆន្ទៈមនសិការជាតិដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការដោះស្រាយបញ្ហាព្រំដែនជាមួយថៃដោយសន្តិវិធី តាមរយៈការយកបញ្ហា ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅដោះស្រាយនៅតុលាការយុត្តិធម៌អន្តរជាតិ (ICJ) ស្របតាមច្បាប់អន្តរជាតិ ព្រមទាំងប្រើប្រាស់យន្តការទ្វេភាគីដែលមានស្រាប់ក្នុងការចរចារ ដើម្បីឈានទៅពន្លត់និងបញ្ចប់វិវាទនៅតំបន់ព្រំដែនដ៏រសើបនេះ ហើយងាកមករក្សា និងកសាងព្រំដែនប្រកបដោយសន្តិភាព មិត្តភាព សហប្រតិបត្តិការ និងការអភិវឌ្ឍ។
ជាមួយគ្នានេះ កម្ពុជានៅតែរក្សាសិទ្ធិស្វ័យការពារខ្លួនក្នុងការការពារបូរណភាពទឹកដីតាមគ្រប់មធ្យោបាយ ក្នុងករណីមានការឈ្លានពានណាមួយកើតឡើង។ អង្គពិធីទាំងមូល បានប្តេជ្ញាចិត្តរួបរួមសាមគ្គីជាមួយរាជរដ្ឋាភិបាលក្រោមការដឹកនាំដ៏ឈ្លាសវៃនិងភាពប្រាកដនិយមរបស់សម្តេចមហាបវរធិបតី ហ៊ុន ម៉ាណែត ចំពោះវិធានការផ្លូរច្បាប់ ការទូត និងយោធា សំដៅរក្សាការពារឱ្យបានដាច់ខាតនូវសុខសន្តិភាព អធិបតេយ្យភាព បូរណភាពទឹកដី និងឯករាជ្យជាតិ។
អង្គពិធី បពថ្លែងអំណរគុណ ដឹងគុណ និងកោតសរសើរចំពោះវីរភាពរបស់កងកម្លាំងប្រដាប់អាវុធគ្រប់ប្រភេទ ដែលកំពុងឈរជើងការពារបូរណភាពទឹកដីយ៉ាងអង់អាចក្លាហាននៅតាមបណ្តោយព្រំដែន។
លោក ប៉ិច សុខា បានលើកឡើងផងដែរថា នៅក្នុងវេទិកាសាធារណៈនេះ នឹងអាចឱ្យក្រុមការងារ និងគ្រប់អង្គភាពពាក់ព័ន្ធដែលស្ថិតក្រោមចំណុះឃុំទ្រៀលនេះបានស្តាប់ បានដឹង បានយល់ ក្នុងគោលដៅដើម្បីពង្រឹងការអនុវត្តការផ្តល់សេវាសាធារណៈ កាត់បន្ថយភាពអសកម្ម អំពើពុករលួយ ដើម្បីបង្កើននូវការជឿទុកចិត្តពីសំណាក់ប្រជាពលរដ្ឋនៅមូលដ្ឋាន មកលើរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា និងបន្តការអភិវឌ្ឍមូលដ្ឋានឃុំទ្រៀលឱ្យកាន់តែរីកចម្រើនឆ្ពោះទៅមុខបន្ថែម៕
