(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកទឹកចិត្តឱ្យប្អូនៗសិស្សានុសិស្ស និងយុវជននាំគ្នាប្តូរ និងបង្កើនទម្លាប់មកអានសៀវភៅ ដើម្បីបង្កើនចំណេះដឹង និងសមត្ថភាពរបស់ខ្លួនជាប្រចាំ ស្របតាមយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧។ ការអានជាមូលដ្ឋានគ្រឹះដ៏រឹងមាំផ្តល់នូវចំណេះដឹង ជំនាញ ចំណេះដឹងទៅទៅកាន់តែទូលំទូលាយ ការអានជួយឱ្យការនិយាយកាន់តែល្អ ដោយមានឃ្លាមានប្រយោគ មានបែបបទនៃការនិយាយ និងការប្រើពាក្យពេចន៍បានត្រឹមត្រូវ ទៅតាមកាលៈទេសៈ។

លោករដ្ឋមន្ត្រី នេត្រ ភក្ត្រា បានអះអាងថា ក្រសួងព័ត៌មាននឹងនៅតែបន្តគាំទ្រចំពោះពិព័រណ៍ សៀវភៅរបស់ Big Bad Wolf Books នេះ ដែលបានចូលរួមលើកកម្ពស់ការសិក្សារៀនសូត្រ ចំណេះដឹង និងពង្រឹងវប្បធម៌នៃការអាន និងសូមអំពាវនាវឱ្យប្រជាជនកម្ពុជាចូលរួមក្នុងព្រឹត្តិការណ៍នេះ និងធ្វើឱ្យការអានក្លាយជាទម្លាប់ពេញមួយជីវិត។

ការថ្លែងបែបនេះរបស់លោក នេត្រ ភក្ត្រា បានធ្វើឡើងនៅក្នុងឱកាសដែលឯកឧត្តម បានអញ្ជើញជាអធិបតីភាពបើកសម្ពោធពិព័រណ៍លក់សៀវភៅ Big Bad Wolf Books ដែលបានរៀបចំឡើងក្នុងផ្សាររុងរឿង ស្ថិតនៅក្នុងភូមិគៀនឃ្លាំង សង្កាត់ព្រែកលាប ខណ្ឌជ្រោយចង្វារ ក្នុងរាជធានីភ្នំពេញ នៅថ្ងៃទី២៦ ខែមិថុនា ឆ្នាំ២០២៦នេះ។

លោករដ្ឋមន្ត្រី នេត្រ ភក្ត្រា ក៏បានរម្លឹកថា ប្រទេសកម្ពុជា ក្រោមមគ្គុទ្ទេសក៍ដឹកនាំដ៏ឆ្នើមរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា និងបន្តដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចាត់ទុកវិស័យអប់រំជាវិស័យអាទិភាពរបស់រាជរដ្ឋាភិបាលកម្ពុជា និងបានគាំទ្រ ជំរុញលើកទឹកចិត្តវិស័យអំណាន តាមរយៈការបង្កើតទិវាជាតិអំណានជាលើកដំបូងនៅក្នុងឆ្នាំ២០១៦ ក្នុងគោលបំណងដើម្បីបណ្ដុះទម្លាប់អាន ជំរុញវប្បធម៌អាន លើកកម្ពស់សមត្ថភាពអាន និងការតែងនិពន្ធ សំដៅរួមចំណែកការពារ និងពង្រឹងវប្បធម៌ អរិយធម៌ខ្មែរ។

លោករដ្ឋមន្ត្រី នេត្រ ភក្ត្រា បានលើកឡើងយ៉ាងដូច្នេះថា៖ «ខ្ញុំអាចធ្វើជាសាក្សីរស់មួយថា ការអាន គឺពិតជាបានផ្តល់នូវមូលដ្ឋានគ្រឹះដ៏រឹងមាំ ផ្តល់នូវចំណេះដឹង និងធ្វើឱ្យយើងកាន់តែមានភាពរឹងមាំផ្នែកសមត្ថភាព ជំនាញ និងចំណេះដឹងទូទៅផង។ នៅពេលដែលយើងអានច្រើនគឺយើងនឹងដឹង និងចេះកាន់តែច្រើន»។

ជាមួយគ្នានេះដែរ លោករដ្ឋមន្ត្រី នេត្រ ភក្ត្រា បានបន្តថា មិនតែប៉ុណ្ណោះការអាន គឺអាចជួយដល់ការសរសេរត្រូវតាមវេយ្យាការណ៍។ ដូច្នេះនៅពេលយើងសរសេរសំណេរ អត្ថន័យលើអត្ថបទអ្វីមួយ គឺអាចយកគន្លឹះអ្វីមួយ និងរៀបប្រើវេយ្យាករណ៍អ្វីមួយមកសរសេរអត្ថបទបានយ៉ាងល្អ ហើយដោយសារការអានអាចជួយដល់ការស្តាប់របស់យើងដោយមិនច្រឡំអត្ថន័យ។

លោករដ្ឋមន្រ្តី នេត្រ ភក្ត្រា បានគូសបញ្ជាក់ថា៖ «បើកាលណាយើងអានច្រើន យើងនឹងមានគំនិតច្រើន ហើយយើងក៏អាចបង្រួមទៅលើខ្លឹមសារថាអ្វីដែលជាមូលដ្ឋានយើងចង់ប្រាប់ និងខ្លឹមសារអ្វីល្អដែលយើងចង់និយាយ។ ពីព្រោះថាការនិយាយជួនកាលមិនប្រាកដទេថាគេស្តាប់ទាំងអស់ទេ។ អ៊ឹចឹងបើចង់ឱ្យការនិយាយគេស្តាប់ គឺយើងចាំបាច់ត្រូវតែជ្រើសរើសនូវពាក្យពេចន៍ ក៏ដូចជាព័ត៌មានដែលយើងត្រូវបញ្ចេញ មិនមែននិយាយហើយចង់បញ្ចប់មិនដឹងថាជាអ្វីនោះទេ»។

លោករដ្ឋមន្ត្រី នេត្រ ភក្រ្តា បានលើកឡើងថា ការនិយាយមួយដែលពូកែ គឺយើងចាំបាច់ត្រូវឆ្លងកាត់មូលដ្ឋានច្រើន ក្នុងនេះចំណុចទី១ គឺចំណេះដឹងទូលំទូលាយ ស្គាល់ប្រធានបទរបស់ខ្លួនឱ្យច្បាស់លាស់ ត្រូវមាន ទឡ្ហិករណ៍ ភស្ថុតាង ឯកសារ និងអ្វីដែលសំខាន់មួយទៀត គឺទិន្នន័យ។ ហេតុអ្វីដែលតម្លៃការអានសៀវភៅខុសពីការអានព័ត៌មាន។

ទន្ទឹមនឹងនេះដែរ រដ្ឋមន្រ្តីក្រសួងព័ត៌មាន បានបន្ថែមថា យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧ ដោយបានផ្តោតសំខាន់លើមូលធនមនុស្ស ដែលសំដៅទៅលើធនធានមនុស្សដែលមានសមត្ថភាព មានចំណេះដឹង មានទេពកោសល្យ មានស្នាដៃ មានសុខភាពល្អ គុណភាព មានគុណធម៌ និងមានសុជីវធម៌។ ចំណេះដឹង គឺចេញពីសៀវភៅនេះឯង ហើយយើងក៏មិនអាចពឹងនរណាម្នាក់បានដែរក្រៅពីខ្លួនឯង។ ហេតុនេះហើយទ្រឹះស្តីបុរាណរបស់យើងបានលើកឡើងថា «ចំណេះដឹងវាជាឃ្លាំងប្រាក់» និងចំណេះដឹងនេះកណ្តៀរក៏កាត់មិនកើត កាន់តែប្រើកាន់តែរីកចម្រើន។

លោកស្រី Jacqueline Ng សហស្ថាបនិករបស់ Big Bad Wolf Books បានលើកឡើងថាពិព័រណ៍សៀវភៅនេះ គឺមានការបញ្ចុះតម្លៃរហូតដល់ ៩៥ភាគរយ ក្នុងនេះដែរតម្លៃសៀវភៅទាបបំផុតចាប់ពីដុល្លារ ក្នុងមួយក្បាល។ ជាមួយគ្នានេះចាប់ពីថ្ងៃចន្ទដល់ថ្ងៃសុក្រ សិស្ស-និស្សិតទាំងអស់នឹងទទួលបានការបញ្ចុះតម្លៃ៥ភាគរយ លើសៀវប្រភេទមួយចំនួន។ ដើម្បីទទួលបានការបញ្ចុះតម្លៃនេះពួកគេគ្រាន់តែបង្ហាញកាតសិស្សនិស្សិត ឬស្លៀកពាក់ឯកសណ្ឋានសិស្សនិស្សិតរបស់គេនៅពេលគិតលុយ។ កម្មវិធីបញ្ចុះតម្លៃនេះ ស័ក្តិសមបំផុតសម្រាប់ក្រុមសិស្សនិស្សិត និងអ្នកអានវ័យក្មេង ក្នុងការបង្កើតបណ្ណាល័យផ្ទាល់ខ្លួន។

លោកស្រីបានបញ្ជាក់ថា ពិព័រណ៍សៀវភៅនេះគឺជាលើកទី៤ហើយនៅកម្ពុជា។ សម្រាប់សៀវភៅដែលគាត់បាននាំយកមកលក់នេះកន្លងមកត្រូវបានលក់ចេញបានប្រមាណជាង៦០ភាគរយ ដែលនេះបង្ហាញថាការអានសៀវភៅក្នុងស្រទាប់យុវជនមានការកើនឡើងបន្តបន្ទាប់។ គួរបញ្ជាក់ថា ពិព័រណ៍លក់សៀវភៅនេះនឹងចាប់ផ្តើមពីថ្ងៃទីច័ន្ធដល់ថ្ងៃព្រហស្បតិ៍ចាប់ពីម៉ោង ១០ព្រឹកដល់ម៉ោង១០យប់ និងថ្ងៃសុក្រដល់ថ្ងៃអាទិត្យ ចាប់ពីម៉ោង១០ព្រឹកដល់ម៉ោង១២យប់ នៅផ្សាររុងរឿង ស្ថិតនៅក្នុងភូមិគៀនឃ្លាំង សង្កាត់ព្រែកលាប ខណ្ឌជ្រោយចង្វារ ក្នុងរាជធានីភ្នំពេញ៕