(ភ្នំពេញ)៖ ជាថ្មីម្តងទៀត តាមរយៈបណ្តាញទំនាក់ទំនងសង្គមផ្លូវការ នៅព្រឹកថ្ងៃទី២៨ ខែមិថុនា ឆ្នាំ២០២៥នេះ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា មានពួកក្រុមអគតិ និងជ្រុលនិយម ឆ្លៀតឱកាសបង្កើតការភាន់ច្រលំ ឬបង្កប់ចេតនាទុច្ចរិតផ្សេងៗ បានចិញ្ចឹមចិត្តបង្កើតការផ្សព្វផ្សាយព័ត៌មានក្លែងក្លាយ ដោយបន្លំជាផេកផ្លូវការរបស់សម្តេច។
សម្តេចបានអំពាវនាវដល់បងប្អូនប្រជាពលរដ្ឋ សូមប្រុងប្រយ័ត្នចំពោះព័ត៌មានក្លែងក្លាយទាំងនោះ និងសូមតាមដានផេកផ្លូវការ របស់សម្តេច។
សម្តេចបវរធិបតី ហ៊ុន ម៉ាណែត បានបង្ហោះសារទាំងស្រុងដូច្នេះថា៖ «សូមជម្រាបជូនបងប្អូន អ៊ំពូមីង តាយាយមេត្តាជ្រាបថា ពួកក្រុមអគតិ និងជ្រុលនិយម ឆ្លៀតឱកាសបង្កើតការភាន់ច្រលំ ឬបង្កប់ចេតនាទុច្ចរិតផ្សេងៗ បានចិញ្ចឹមចិត្តបង្កើតការផ្សព្វផ្សាយព័ត៌មានក្លែងក្លាយ ដោយបន្លំជាផេកផ្លូវការរបស់សម្តេចបវធិបតីនាយករដ្ឋមន្ត្រី តាមរយៈ៖
១៖ ការផុសដោយធ្វើជារូបភាព ហើយផុសក្នុងក្រុមផ្សេងៗរបស់បណ្តាញសង្គមហ្វេសប៊ុក
២៖ កាត់តរូបគណនីរបស់សម្តេចបវធិបតី ដោយសរសេរសារក្លែងក្លាយ ភ្ជាប់នឹងរូបភាព តែចំនុចដែលខុស គឺគ្មានបញ្ចេញម៉ោង បើផុសចេញពីផេកពិត គឺនឹងមានការបង្ហាញម៉ោង ឬថ្ងៃផុស (ដូចជូនភ្ជាប់ក្នុងរូបភាព)
៣៖ ការផុសចេញពីផេកផ្លូវការ គឺតែងមានតំណភ្ជាប់ទាំងអស់ (Link) មានន័យថាគ្រប់ផុស គឺតែងមាន Link មួយជានិច្ច
៤៖ ផេកផ្លូវការរបស់សម្តេចបវធិបតី មានតំណភ្ជាប់តែមួយ គឺ https://www.facebook.com/share/1HMhbKEmCr/?mibextid=wwXIfr
៥៖ ផេកផ្លូវការរបស់សម្តេចបវរធិបតី គឺមានអ្នកតាមដាន ១,៨លាននាក់។
អាស្រ័យហេតុនេះ សូមបងប្អូន អ៊ំពូមីង តាយាយ បង្កើនការប្រុងប្រយ័ត្ន និងតាមដានផេកផ្លូវការរបស់សម្តេចបវរធិបតី ដែលមានតែមួយ ដូចបានបញ្ជាក់ជូននិងតាមរយ:តំណភ្ជាប់ខាងលើ ហើយមិនមានការផុសក្នុងក្រុមផ្សេងនៃហ្វេសប៊ុកនោះទេ»៕
